«Pradstaŭnica Sabčak nazvała žartam paviedamleńni pra jaje płany źmianić proźvišča» — małavažnaje, zdavałasia b, paviedamleńnie. Tym nie mienš, dziaržaŭnaje rasijskaje ahienctva RIA «Naviny» trymaje jaho na svaim partale ŭ zamacavanym najhałoŭnym uvieś ranak čaćviarha.
Paviedamleńni pra Ksieniju Sabčak uvieś čas iduć u top navin dziaržaŭnych i kantralavanych ŚMI ŭ Rasii. Pieravažna heta nie palityčnyja zajavy, a śvieckaja chronika.
Vyjaŭny kantrast z hetym: nivodzin telekanał, nivodzin vialiki partał nie paviedamlaje ničoha pra Alaksieja Navalnaha. Antykarupcyjny błohier prypiačataŭ «Adzinuju Rasiju» mianuškaj «partyja žulikaŭ i zładziejaŭ» i raskryŭ infarmacyju ab šmatlikich pałacach i carskim ładzie žyćcia Uładzimira Pucina, Dźmitryja Miadźviedzieva i ich atačeńnia. Hetym Navalny zasłužyŭ papularnaść u rasijskaj apazicyi. Kab zabaranić jamu bałatavacca, ułady sfabrykavali suprać jaho kryminalnuju spravu.
Rola dekaratyŭnaha kandydata ad libierałaŭ, adviedzienaja Ksienii Sabčak, vyklikaje žarty ŭ niezaležnym hramadstvie Rasii.
«Rola, jakoj los uznaharodziŭ Ksieniju Sabčak, — heta zapavietnaja mara ŭsiakaha rasijanina, — piša ŭ siabie ŭ fejsbuku žurnalist «Novoj haziety» Maksim Harunoŭ. — Łajać cara pa zahadzie cara, kab car i dalej zastavaŭsia carom. I caru słužyš, i dušu ŭ łajancy advodziš, i ŭ Sibir nie adpraviać — voś heta, darahija maje, i nazyvajecca šancavańniem kaśmičnaha maštabu».
