Zaŭtra ŭ Nacyjanalnaj biblijatecy adbudziecca prezientacyja biełaruskamoŭnaj azbuki finansavaj hramatnaści dla dziaciej pad nazvaj «Hrošyk i tajamničy Košyk. Azbuka finansavaj hramatnaści», paviedamlaje BIEŁTA.
Aŭtaram tekstaŭ staŭ piśmieńnik, hałoŭny redaktar časopisa «Viasiołka» Uładzimir Lipski. Pavodle słovaŭ aŭtara, hałoŭny hieroj knihi — Hrošyk, pačaŭ svajo žyćcio na staronkach časopisa «Viasiołka» dva hady tamu. Z numara ŭ numar publikavalisia historyi pra jaho i zadańni dla junych čytačoŭ, jakija dazvalali raźbiracca ŭ składanych finansavych pytańniach.
Dastupnaj movaj dzieciam tłumačyłasia, što takoje siamiejny biudžet, biźnies, inviestar, ablihacyi. I zaraz ŭsie historyi sabrali ŭ adnu malaŭniča aformlenuju knihu, svojeasablivuju finansavuju encykłapiedyju.
Elemientarnyja viedy ekanomiki, navyki kiravańnia hrašyma, razumnyja zvyčki da źbieražeńnia, na dumku vydaŭcoŭ, navučać pravilna płanavać biudžet, pavodzicca z hrašyma, dazvolać dakładna rasstaŭlać pryjarytety, prymać piśmiennyja rašeńni, paźbiahać finansavych prablem.
Aformiła knihu mastak Kaciaryna Biłan. Tyraž skłaŭ 1 tys. asobnikaŭ, ale płanujecca, što vydańnie buduć dadrukoŭvać. «Hrošyk i tajamničy Košyk. Azbuka finansavaj hramatnaści» papoŭnić kalekcyi biblijatek. Na prezientacyi ŭ Nacyjanalnaj biblijatecy projdzie animacyjnaje pradstaŭleńnie z udziełam hałoŭnaha hieroja knihi Hrošyka. Pačatak dvuchhadzinnaha mierapryjemstva 29 listapada ab 11 hadzinie u halerei «Rakurs» Nacyjanalnaj biblijateki. Uvachod volny.
