Ministr infarmacyi Alaksandr Karlukievič byŭ adnym z tych, chto adkryvaŭ štohadovuju Minskuju knižnuju vystavu.
Aleś Karlukievič. Fota Voli Aficeravaj.
«Naša Niva» zapytałasia ŭ čynoŭnika, što moža zrabić «Chartyja-97», kab znoŭ być dastupnaj u Biełarusi? U studzieni Ministerstva infarmacyi abmiežavała dostup da hetaha partała na terytoryi Biełarusi.
«Ja nie čytač «Chartyi» ŭ apošni čas, chacia ŭ adpaviednaści z zakonam maju takuju mahčymaść jak pradstaŭnik Ministerstva infarmacyi. Biezumoŭna, my budziem hladzieć na dalejšy źmiest hetaha internet-resursu. Heta vielmi niebiaśpiečna niešta płanavać i padkazvać. «Pišycie tak, albo pišycie inačaj…» Vidać, «Chartyja» zastaniecca «Chartyjaj», a našyja dziejańni zastanucca našymi dziejańniami i našym vykładańniem dziaržaŭnaj pazicyi», — skazaŭ Karlukievič.
Jak novy ministr pastaviŭsia da pieršych krokaŭ na pasadach redaktaraŭ Biełteleradyjokampanii, STB i «Sovietskoj Biełoruśsii», jakija niadaŭna byli pryznačanyja kiraŭnikom krainy?
«Praca novych kiraŭnikoŭ ŚMI — heta praca dastatkova viadomych tvorčych ludziej. Ja spadziajusia, što ich novyja kroki — heta novyja pieradačy, novyja artykuły. Siońnia ja znachodžu šmat cikavaha ŭ pracy STB, Biełteleradyjokampanii, haziety «Sovietskaja Biełoruśsija». Na telebačańni šmat resursaŭ, i tolki ad źmieny administracyi nie ŭsio rašajecca. Što tyčycca «Sovietskoj Biełoruśsii», to hazieta — heta tvar i pazicyja jaje redaktara», — skazaŭ Karlukievič.
Jon adznačyŭ, što pakul nie viedaje, chto budzie pryznačany na pasadu hienieralnaha dyrektara infarmacyjnaha ahienctva BiełTA na miesca Dźmitryja Žuka.
Što tyčycca ahulnaha ŭzroŭniu svabody słova, to ministr skazaŭ: «Narmalny ŭzrovień svabody słova».
