Zajaŭniki mitynhu i arhanizatary kancertu da 100-hodździa Biełaruskaj Narodnaj Respubliki ŭ Miensku sustrelisia 12 sakavika z pradstaŭnikami HUUS Mienharvykankamu. Pra heta paviedamiŭ Svabodzie staršynia ruchu «Za svabodu» Juraś Hubarevič.
Pačatak mitynhu-kancertu a 14-j hadzinie, zbor kala Opernaha teatru — a 13-j. Zaviaršeńnie planujecca a 19-j hadzinie. Mierapryjemstva projdzie pad lozunham «Śviata niezaležnaści».
Milicyjanty zhadali pra «niezaplanavany scenar»
Pavodle Hubareviča sustreča prajšła biez ultymatumaŭ, jak zazvyčaj heta było ŭ minułyja hady.
«Adnak prahučała, što kali mierapryjemstva pojdzie nie pa zaplanavanym scenary, to ŭ haradzkoj milicyi budzie dastatkova sił i srodkaŭ, kab jaho spynić. Ale što miełasia na ŭvazie pad «niezaplanavanym scenarom» nie tłumačyłasia. Tradycyjna jany prademanstravali svaju rašučaść dziejničać u tym liku i siłavymi metadami. Ale spadziajusia, što da hetaha nie dojdzie. Bo ŭsie detali, jakija vyklikali sumnievy ŭ patencyjnych udzielnikaŭ — adnosna vykarystańnia nacyjanalnaj symboliki, režymu propusku — my abmierkavali i znajšli parazumieńnie», — skazaŭ Juraś Hubarevič.
Možna brać bieł-čyrvona-biełyja ściahi
Adnosna pranosu i vykarystańnia bieł-čyrvona-biełych ściahoŭ pradstaŭniki milicyi skazali, što buduć abapiracca na rašeńnie Mienharvykankamu.
«Pradstaŭnik Mienharvykankamu paćvierdziŭ, što tyja abmiežavańni, jakija jość u rašeńni adnosna mierapryjemstva, datyčać najpierš lozunhaŭ ci transparantaŭ, jakija nie majuć nijakaha dačynieńnia da tematyki mierapryjemstva. Było paćvierdžana, što adnosna nacyjanalnaj symboliki nijakich abmiežavańniaŭ nie budzie. Možna brać bieł-čyrvona-biełyja ściahi, vudy, kab było zručna razmachvać».
Pradstaŭniki milicyi paćvierdzili pra namier ščylna kaardynavacca z družynaj, jakaja budzie stvorana arhanizatarami.
Padčas akcyi ŭ teatry budzie spektakl
Taksama milicejskaje kiraŭnictva cikaviła, jakim čynam budzie raźmieščana scena, kropki pa handli suvenirami i praduktami, bijaprybiralni i hrymiorki dla artystaŭ.
«Taksama było zhadana, što Operny teatar maje dva spektakli ŭ 12 i 18 hadzin. Tamu hledačy pavinny mieć mahčymaść dostupu da budynku. Taksama my abmierkavali miery biaśpieki i raźmiaščeńnie turnikietaŭ. Režym dahladu budzie nie bolš strohi za zvyčajny, jaki ŭžyvajecca pry praviadzieńni haradzkich marapryjemstvaŭ, takich jak muzyčnyja viečary na płoščy Svabody».
Udakładnieńnie:
U pieršasnaj viersii artykuła havaryłasia, što režym dahladu budzie nie mienš strohi za zvyčajny, jaki ŭžyvajecca pry praviadzieńni haradzkich marapryjemstvaŭ. Nasamreč režym dahladu budzie nie bolš strohi za zvyčajny.
