U haziecie «Carkoŭnaje słova», jakaja vydajecca pry Biełaruskim Ekzarchacie, źjaviŭsia artykuł «Adarvanyja nasillem, uźjadnanyja luboŭju» da 180-hodździa Połackaha saboru. Aŭtaram publikacyi vystupiŭ prafiesar Minskaj duchoŭnaj akademii, pieršy prarektar Instytuta teałohii BDU Sierhij Hardun.
U «Carkoŭnym słovie» abiacajuć, što publikacyjaj Harduna jany adkryvajuć sieryju, pryśviečanuju «ŭźjadnańniu biełaruskich unijataŭ z Pravasłaŭnaj carkvoj».
Varta adznačyć, što 2018 hod pa błasłavieńni mitrapalita Minskaha i Zasłaŭskaha Paŭła byŭ abvieščany na terytoryi BPC «hodam archijareja-ŭźjadnalnika mitrapalita Iosifa Siamaški». Jon byŭ adnym z ruchavikoŭ skasavańnia Unii na terytoryi Rasijskaj impieryi. Sioleta spaŭniajecca 220 hadoŭ z dnia jaho naradžeńnia i 150 hadoŭ z momantu śmierci.
Kali Hardun piša pra Połacki sabor, jaki skasavaŭ unijactva na terytoryi Rasijskaj impieryi, to adznačaje, «što členy saboru ŭkazvajuć, što ŭnijackaja carkva ad pačatku svajho była nieadjemnaj častkaj Ruskaj Carkvy».
«I tolki polskaja palityčnaja ŭłada adarvała častku pravasłaŭnaha naroda ad jaho Maci-Carkvy i zrabiła jaho ŭnijackim», — praciahvaje Hardun.
Śviatar pierakanany, što ŭnijaty (jak pravasłaŭnyja) stahodździami ciarpieli pryhniot i hanieńni z boku polskaha ŭradu i Katalickaha Kaściołu. «Uschodnija abrady pravasłaŭnaj Carkvy źmianialisia łacinskimi, unijackaje duchavienstva było nieadukavanym, isnavała mocnaja pahroza kančatkovaha źlićcia z katalikami», — adznačaje Hardun.
Naturalna, što stanoŭčaj rolaj nazyvajecca dałučeńnie biełaruskich ziemlaŭ naprykancy XVIII stahodździa da Rasijskaj impieryi. Maŭlaŭ, tolki tady ŭnijaty narešcie zmahli abjadnacca z pravasłaŭnymi.
Na siońnia ŭ Biełarusi isnuje hreka-katalickaja (unijackaja) carkva. Pa roznych dadzienych, jana naličvaje ad 3 da 10 tysiač prychilnikaŭ.
