Rasijski artyst Alaksiej Varabjoŭ pavinien byŭ vystupić u Minsku ŭ śniežni. Spačatku kancert pieranieśli na studzień. Paźniej jaho i zusim admianili, abviaścili ab viartańni srodkaŭ. Ale viarnuć svaje hrošy ŭ ludziej, jakija nabyli kvitki, nie atrymlivajecca da hetaha času: u pryznačany čas arhanizatar nie pryjšoŭ, a paśla naohuł pierastaŭ vychodzić na suviaź. Spravaj zaniałasia milicyja, paviedamlaje Tut.by.
Zvarot hrošaj za kvitki musiŭ adbycca ŭ Prime Hall. Arhanizatar pryznačyŭ sustreču tam, ale nie pryjšoŭ. Paźniej i viber, i telefon pierastali być dastupnymi. Prime Hall, dzie pavinien byŭ adbycca kancert, nijakaj adkaznaści nie niasie.
Kiraŭnik Prime Hall Aksana Adaškievič adznačaje, što sam Prime Hall kancerty nie arhanizoŭvaje, a tolki pradstaŭlaje placoŭku ŭ arendu. Z TAA «Kipier Pramoŭšen» (arhanizataram kancertu Alaksieja Varabjova) pracavali ŭ pieršy raz.
Arhanizacyja nie ličyłasia ŭ Rejestry kamiercyjnych arhanizacyj z pavyšanaj ryzykaj ździajśnieńnia pravaparušeńniaŭ u ekanamičnaj śfiery. Da taho ž jany pradjavili hastrolnaje paśviedčańnie, jakoje vydaje Minharvykankam.
Kali arhanizatar paprasiŭ ab pieranosie daty kancertu z 10 śniežnia na 25 studzienia, placoŭku heta nie źbiantežyła: časam takoje zdarajecca. Za niekalki dzion da studzieńskaha kancertu dyrektar TAA «Kipier Pramoŭšen» sam patelefanavaŭ u Prime Hall.
Ale ŭ pieršy dzień, kali byŭ zapłanavany zvarot hrošaj, stała viadoma, što dyrektar TAA «Kipier Pramoŭšen» znachodzicca na lačeńni ŭ Rasii i ni jon, ni jaho pradstaŭnik pryjechać u Prime Hall nie zmohuć. Pra heta jon paviedamiŭ kiraŭniku kancertnaj placoŭki pa telefonie. Ludzi prychodzili ŭ Prime Hall, ale zastavalisia ni z čym.
Adaškievič adznačaje, što za try z pałovaj hady, što pracuje placoŭka, takaja situacyja zdaryłasia ŭpieršyniu.
— Tak, admieny kancertaŭ zdaralisia, ale ŭsie arhanizatary zaŭsiody viartali hrošy biez prablem. Zaraz hetaj situacyjaj zajmajucca kampietentnyja orhany, — reziumuje kiraŭnik Prime Hall.
Mieniedžmient Alaksieja Varabjova paćvierdziŭ Tut.by, što kancert u Minsku ŭ hrafiku artysta ŭsio-taki byŭ.
— U pieršuju datu, vybranuju biełaruskimi arhanizatarami, Alaksiej byŭ zaniaty ŭ efirnym kancercie Pieršaha kanała ŭ Maskvie i zajaŭleny na afišach. Pryjezd u Minsk vymušana pieranieśli na studzień.
U studzieni dziela kancerta ŭ Minsku Varabjoŭ śpiecyjalna prylacieŭ u Rasiju z ZŠA (u Štatach jon byŭ pa pracy).
— Ale prosta napiaredadni mierapryjemstva kancert byŭ admienieny biełaruskimi arhanizatarami. My nijakaj pieradapłaty ad ich nie atrymlivali i taksama vielmi zasmučanyja tym, što adbyvajecca, — rastłumačyli ŭ maskoŭskim ofisie.
Źviazacca z TAA «Kipier Pramoŭšen» Tut.by nie ŭdałosia. U HUUS Minharvykankama paviedamili, što Centralnym RUUS pa hetym fakcie pravodzicca pravierka.
