Fota Siarhieja Hudzilina
Śviatary i kleryki pryzyŭnoha ŭzrostu nia pojduć sioleta na vajskovuju słužbu, niahledziačy na pozvy z vajenkamataŭ, paviedamiŭ Radyjo Svaboda šerah krynicaŭ u katalickich kołach.
Pradstaŭniki duchavienstva kažuć, što prezydencki ŭkaz ab adterminoŭcy ad vajskovaj słužby dla hetaj katehoryi pryzyŭnikoŭ užo nibyta padpisany. Aficyjnaha paćvierdžańnia hetaj infarmacyi pakul niama.
U traŭni dziasiatki budučych i dziejnych katalickich i pravasłaŭnych śviataroŭ pa ŭsioj Biełarusi atrymali pozvy z vajenkamataŭ. Pieršyja kleryki i śviatary musili nakiravacca ŭ vojska ŭžo 28 traŭnia.
Kanferencyja katalickich biskupaŭ źviarnułasia da Alaksandra Łukašenki z prośbaj ab adterminoŭcy ad vajskovaj słužby. Jararchi Biełaruskaj pravasłaŭnaj Carkvy taksama źviarnulisia pa tłumačeńni ŭ Ministerstva abarony.
Sytuacyja, kali duchavienstva pryzyvali słužyć tak masava, skłałasia ŭpieršyniu. Raniej, jak paviedamlali Svabodzie pradstaŭnici duchavienstva, zdaralisia adzinkavyja vypadki pryzyvu praz pamyłku, ale takija sytuacyi chutka vyrašalisia.Ahułam dla seminarystaŭ i śviataroŭ raniej dziejničała adterminoŭka ad vojska. Kiraŭnictva seminaryj rychtavała śpisy navučencaŭ i pieradavała ich u dziaržaŭnyja orhany. Rašeńnie ab adterminoŭcy štohod prymaŭ kiraŭnik dziaržavy i ŭzhadniaŭ admysłovy ukaz.
