U Minsku prajšoŭ fiestyval intelektualnaj knihi «Pradmova». Jaho imprezy naviedali sotni ludziej, udzieł brali piśmieńniki, vydaŭcy, knihahandlary.
Admysłovy dypłom za aktyŭny ŭdzieł u fiestyvali atrymała staličnaja kniharnia «Akademičnaja kniha». Jakija ž jaje vydańni najbolš cikavili čytačoŭ? «Akademkniha» skłała rejtynh.
1. «Załataja šarścinka, srebranaja pavucinka»
Pierakaz Uładzimira Jahoŭdzika. Ilustracyi Paŭła Tatarnikava.
U knizie 14 narodnych kazak, upieršyniu zapisanych daśledčykami ŭ XIX stahodździ i pierakazanych piśmieńnikam Uładzimiram Jahoŭdzikam. Bolšaść kazak małaviadomyja šyrokaj publicy. Malunki da knihi, stvoranyja suśvietna viadomym biełaruskim hrafikam Paŭłam Tatarnikavym, adznačany samymi vysokimi ŭznaharodami mižnarodnaj prafisijnaj supolnaści.
2. Ajčyna: malaŭničaja historyja. Častka pieršaja. Ad Rahniedy da Kaściuški.
Aŭtar tekstu Uładzimir Arłoŭ. Mastak Pavieł Tatarnikaŭ.
Novaja kniha Uładzimira Arłova «Ajčyna: malaŭničaja historyja. Ad Rahniedy da Kaściuški» taksama bahata azdoblenaja malunkami Paŭła Tatarnikava.
Tatarnikaŭ pracavaŭ nad knihaj šeść hadoŭ, Uładzimir Arłoŭ — čatyry. Aŭdytoryja, na jakuju raźličanaja kniha, — dzieci i padletki.
Kniha takoha mastackaha ŭzroŭniu — siarod unikalnych ŭ śviecie, nie kažučy pra Biełaruś.
Uvazie čytačoŭ pradstaŭlenaja pieršaja častka vydańnia. Naohuł kniha vychodzić u dźviuch častkach i achoplivaje historyju našaj krainy ad źjaŭleńnia na joj staražytnaha čałavieka da adnaŭleńnia biełaruskaj niezaležnaści na pačatku 1990-ch.
3. BNR. Triumf pobieždiennych. Andriej Čierniakievič
Kniha hrodzienskaha historyka Andreja Čarniakieviča raskazvaje pra stvareńnie Biełaruskaj Narodnaj Respubliki — pieršaha biełaruskaha dziaržaŭnaha ŭtvareńnia ŭ najnoŭšaj historyi. Dziakujučy BNR biełarusy zajavili pra svajo prava na niezaležnaść i samavyznačeńnie. Aŭtar analizuje dziejnaść uradavych struktur BNR u 1918-1925 hh.
4. Andruś Horvat. Radziva «Prudok». Dziońnik
Žurnalist, dvornik, darmajed, haspadar, piśmieńnik. Aŭtar hetaj knihi — čałaviek, jaki šukaje miesca ŭ hetym śviecie. Takim miescam mahła stać utulnaja redakcyja staličnaha časopisa abo modny chipstarski kavorkinh. Ale stała dziedava chata na Paleśsi, na ŭskrajku Biełarusi, na skryžavańni suśvietaŭ. Heta kniha nie pra toje, jak adnavić napaŭrazburany dom, sadzić aharod, daić kazu, žyć u vioscy i nie śpicca. Heta kniha pra toje, jak adnavić napaŭrazburanaha sabie. Moža, jana pra toje, jak viarnucca da karanioŭ, da rodnaj moŭnaj i kulturnaj stychii i pra toje, jak važna nie zhubić babuliny apoviedy. A moža, pra toje, jak stać svaim dla samoha siabie.
5. Alhierd. Bacharevič. Sabaki Eŭropy. Raman
U ramanie šeść vialikich historyj, ścieplenych u mudrahielisty vuzieł, razbłytać jaki nie daść rady nichto. Prynamsi, na heta spadziajecca aŭtar. Na bolš čym dzieviacistach staronkach knihi ŭstupajuć ŭ składanyja ałchimičnyja reakcyi harady, siužety, ludzi, aluzii, słovy…
6. Šałanda A.I. Kod Francyska Skaryny. Hieraldyčnyja materyjały ŭ pražskich i vilenskich vydańniach biełaruskaha pieršadrukara
Vydańnie ŭjaŭlaje saboj navukovaje daśledavańnie, pryśviečanaje rasšyfroŭcy hieraldyčnaha koda Franciška Skaryny. Aŭtar razhladaje hierby i hieraldyčnyja vyjavy ŭ pražskich i vilenskich vydańniach biełaruskaha pieršadrukara jak svojeasablivy kluč, jaki dazvalaje raskryć zašyfravanuju ŭ hraviurach infarmacyju. Praz hierby i hierbavyja vyjavy F. Skaryna ŭ tekście «Biblii Ruskaj» adlustravaŭ najbolš važnyja padziei sučasnaj jamu ajčynnaj i jeŭrapiejskaj historyi — Vienski kanhres 1515 h., ustupleńnie na češski tron karala Ludvika Jahiełona, strata VKŁ Smalenska ŭ 1514 h., vajna 1512—1522 hh. pamiž VKŁ i Maskvoj i inš. Razam z hetym raskryvajecca taki fienomien biełaruskaj historyi i kultury, jak miaščanskaja hieraldyka VKŁ u kancy ChV—ChVI st.
Raźličana na historykaŭ, vykładčykaŭ, studentaŭ i šyrokaje koła čytačoŭ, jakija cikaviacca historyjaj Baćkaŭščyny.
