Alaksandr Łukašenka 30 červienia pravioŭ kadravy ziemlatrus u Kamitecie dziaržaŭnaj biaśpieki. Tak mahło padacca adrazu, kali bačyš, što novych kiraŭnikoŭ atrymali piać abłasnych struktur KDB, źjaviŭsia novy namieśnik staršyni, a taksama načalnik Instytuta nacyjanalnaj biaśpieki.
Kali pryhladziecca bližej, atrymlivajecca, što tyja samyja ludzi pierasunutyja na inšyja pasady. Naprykład, prosta pamianialisia kresłami kiraŭnik Mahiloŭskaha KDB Alaksandr Nieviaroŭski z kiraŭnikom Hrodzienskaha KDB Alaksandram Cierachavym.
Zvyšpapularny rasijski insajderski telehram-kanał «Niezyhar» prajaviŭ svoj nieprafiesijanalizm, kali napisaŭ nastupnaje: «Łukašenka uzmacniaje siłavy błok napiaredadni vybaraŭ. Z orhanaŭ prybirajuć ludziej, jakija naradzilisia nie na terytoryi BSSR, albo vučyŭsia ŭ Maskvie». Na spravie ž ludzi zastalisia tymi samymi, jany prosta źmianili fateli.
Namieśnikam staršyni KDB staŭ Uładzimir Kałač, jaki da hetaha ŭznačalvaŭ upraŭleńnie Kamiteta pa Minsku i Minskaj vobłaści. Na hetaj pasadzie Kałač byŭ ad 2010 hoda. Ustupaŭ na pasadu ŭsiaho tolki padpałkoŭnikam, ale litaralna za dva hady dasłužyŭsia da hienierała. Heta rekordna chutka dla siłavikoŭ takoha ranhu.
Zaśviaciŭsia Uładzimir Kałač u pieratrusach, jakija pravodzilisia paśla prezidenckich vybaraŭ 2010 hoda. Naprykład, mienavita za podpisam Kałača ŭ redakcyju «NN» pryjšoŭ list, što technika kalektyvu budzie viernutaja tolki «paśla praviadzieńnia nieabchodnych pracesualnych dziejańniaŭ». Abstalavańnie redakcyja nie atrymała pa siońnia. Kałač byŭ u śpisie biełaruskich čynoŭnikaŭ, jakim byŭ zabaronieny ŭjezd na terytoryju Jeŭrasajuza.
Miesca Kałača va ŭpraŭleńni KDB pa Minsku i Minskaj vobłaści zaniaŭ Dźmitryj Ravucki, jaki raniej byŭ načalnikam adździeła ŭpraŭleńnia ekanamičnaj biaśpieki. Čałaviek u struktury KDB nie novy.
Pra rakiroŭku Mahiloŭ — Hrodna my ŭžo ŭspomnili. Aleh Stalarčuk uznačaliŭ upraŭleńnie KDB pa Viciebskaj vobłaści. Pierad hetym jon mienš za dva hady byŭ načalnikam Instytuta nacyjanalnaj biaśpieki. Sam Instytut uznačaliŭ Viačasłaŭ Jazierski, jaki dahetul byŭ načalnikam KDB Bresckaj vobłaści.
Faktyčna adzinym novym piersanažam u struktury KDB staŭ Siarhiej Hładyšaŭ, jaki ŭznačaliŭ upraŭleńnie pa Bresckaj vobłaści.
Pra hetaha čałavieka zusim ničoha nie viadoma. Admietna, što ŭ 1950-ja načalnikam druhoha adździeła ŭpraŭleńnia Ministerstva dziaržaŭnaj biaśpieki pa Minskaj vobłasci byŭ Barys Hładyšaŭ, jaki zahinuŭ u 1953-m pry likvidacyi «bandyckaj hrupy, składzienaj z byłych palicajaŭ» ŭ Biarezinskim rajonie.
Jak bačym, kadravyja pierastanoŭki ŭ KDB nie padobnyja da niejkich čystak. Čym źviazanyja takija «haryzantalnyja rakiroŭki» ŭnutry śpiecsłužby my spytali ŭ ekśpierta, kiraŭnika Belarus Security Blog Andreja Parotnikava.
«Takoje robicca dla taho, kab siłaviki nie abrastali suviaziami ŭ rehijonach, kab nie isnavała kruhavoj paruki. Nie stvaralisia miascovyja hrupy ŭpłyvu, jakija mahli b rašyć luboje pytańnie ŭ rehijonie. Takoje isnuje nie tolki ŭ KDB, ale i ŭ inšych strukturach, nie tolki ŭ siłavych. Heta narmalnaja praktyka», — kaža Parotnikaŭ.
«Pa idei heta pavinna razarvać zahannyja suviazi. Ale na moj pohlad, nie duža daje plon. Bo plon moža davać tolki efiektyŭnaja sistema kantrolu i prazrystaja sistema dziaržaŭnaha kiravańnia. I zusim inšaja kultura pavodzinaŭ kiraŭnikoŭ na rehijanalnym uzroŭni. Treba mianiać całkam sistemu. Isnuje prablema padrobki i falsifikacyi dadzienych, jakija pieradajucca ź miescaŭ na vierch. Hetaja historyja ciahniecca ŭžo nie pieršy hod. I hałoŭnaja krynica infarmacyi ŭ rehijonach — śpiecsłužby, z tym i źviazanyja takija pierakidvańni», — ličyć ekśpiert.
Alaksandr Łukašenka padčas pryznačeńniaŭ adznačyŭ, što daviaraje KDB, ab čym śviedčyć takaja fraza?
«Heta rytualnyja słovy, jakija pavinny padbadzioryć kiraŭnictva KDB, što jano ŭ pašanie ŭ kiraŭnika dziaržavy. Kali vam daviaraje kiraŭnik dziaržavy, to vy pavinny adpracavać hety davier, a taksama vyklikać duch spabornictva ŭ inšy siłavych strukturach za davier prezidenta. Heta ciahniecca ad kanca minułaha hoda, kali jon pačaŭ nachvalvać KDB. Na słovach Łukašenka vyłučaje KDB, ale na spravie nie duža. Niejkaha asablivaha finansavańnia jany nie atrymlivajuć, zatoje abciažarvajucca roznaj bzduraj kštałtu vytvorčaści łyžaroleraŭ. Heta, chutčej, niezadavalnieńnie vynikami pracy inšych siłavych viedamstvaŭ», — adznačaje Andrej Parotnikaŭ.
