U sudzie Kastryčnickaha rajona Minska 19 lipienia pačaŭsia sud nad hiendyrektara AAT «DorOrs» Alaksandram Kazłovym. Jaho vinavaciać u kradziažy šlacham złoŭžyvańnia słužbovymi paŭnamoctvami.
«DorOrs» kantraluje amal uvieś razdrobny handal u rajonie čyhunačnaha vakzała i bolš čym na 99% naležyć dziaržavie.
Hiendyrektara i hałoŭnaha inžyniera kampanii zatrymali ŭ kastryčniku 2017 hoda. Śledstva zajaŭlaje, što z červienia 2016 hoda pa kastryčnik 2017-ha słužbovyja asoby ramantavali na STA svaje mašyny i mašyny blizkich za košt pradpryjemstva — BMW 525, BMW Ch5, Volkswagen Passat B6 i Chevrolet Cruze. U buchhałteryju padavalisia padroblenyja dakumienty ab ramoncie słužbovych aŭto «DorOrs» na ahulnuju sumu bolš za 11,8 tysiačy rubloŭ. Śledčyja zajavili pra dzieviać dakazanych anałahičnych faktaŭ.
Hałoŭny inžynier Alaksiej Krupkievič chadajničaŭ pra vyzvaleńnie ad kryminalnaj adkaznaści. Materyjały suprać jaho vyłučanyja ŭ asobnuju vytvorčaść.
Hiendyrektar «DorOrs» Alaksandr Kazłoŭ svaju vinu nie pryznaŭ. Jaho vinavaciać u zamachu na ŭčynieńnie złačynstva i ŭ kradziažy šlacham złoŭžyvańnia słužbovymi paŭnamoctvami, paŭtorna, hrupaj asob pa papiaredniaj zmovie. Kazłovu pahražaje da siami hadoŭ pazbaŭleńnia voli.
Jak stała viadoma na sudzie, Kazłoŭ padaŭ prašeńnie ab pamiłavańni na imia Alaksandra Łukašenki. Tamu jaho abarona padała chadajnictva ab viartańni kryminalnaj spravy prakuroru. Ale sud admoviŭ, bo ŭ zakanadaŭstvie niama takoj padstavy.
