U Indyi ŭ samym razhary biesprecedentnaja pa suśvietnych mierkach kampanija pa «tualetyzacyi» krainy, piša Bloomberg. Jašče nikoli ŭ historyi čałaviectva anivodnaja kultura nie budavała prybiralni takimi šalonymi tempami.
Da pačatku ambitnaj prahramy bolš za pałovu 1,1-miljardnaha nasielnictva Indyi musili spraŭlać jak pilnuju, tak i bolš hruntoŭnuju patrebu paprostu na vulicy ci ŭ poli. Vynik — zabrudžvańnie krynicaŭ pitnoj vady, ježy, raspaŭsiud chvarobaŭ. Pa padlikach Usiaśvietnaha banku, niedachop dostupu da prybiralniaŭ kaštavaŭ Indyi 6,4% VUP štohod.
Niahledziačy na toje, što metavaja aŭdytoryja prahramy — ludzi, jakija žyvuć vielmi biedna, pradprymalniki z usiaho śvietu bačać tut vialikija mahčymaści dla prybytku.
Jak čakajecca, indyjski rynak chimičnych srodkaŭ i servisaŭ dla tualetaŭ ciaham troch hadoŭ vyraście da 62 miljardaŭ dołaraŭ — heta bolš za ŭvieś hadavy VUP Biełarusi.
Naprykład, japonskaja kampanija LIXIL Group raspracavała admysłovuju kanstrukcyju koštam $10, jakaja dazvalaje pieraklučać kanalizacyju pamiž dźviuma vyhrabnymi jamami. Zapoŭnicca adna — i tualet možna lohka pieraklučyć na inšuju. pakul u pieršaj jaminie adkidy pierapracoŭvajucca ŭ kampost.
Da kampanii padklučyŭsia navat indyjski kiniematohraf. Zorka Balivudu Akšaj Kumar źniaŭsia ŭ filmie, jaki prapahanduje zdarovy padychod da prybiralniaŭ pad nazvaj «Tualet: historyja kachańnia»:
