Śledčaje ŭpraŭleńnie USK pa Homielskaj vobłaści ŭstanaviła dačynieńnie da zabojstva 34-hadovaj žycharki Akciabrskaha rajona troch žycharoŭ vioski Čyrvonaja Słabada. Pa padazreńni ŭ ździajśnieńni złačynstva ich zatrymali i ŭziali pad vartu.
Pavodle danych śledstva, fihuranty kryminalnaj spravy raśpivali śpirtnyja napoi na terytoryi doma adnaho z udzielnikaŭ zastolla. Paśla čaho jaho 20-hadovy hość, jaki znachodziŭsia ŭ haspadarčaj pabudovie, udaryŭ paciarpiełuju frahmientam cehły i pałkaj. Ad atrymanych traŭm žančyna pamierła na miescy.
Zatym hość paprasiŭ u sabutelnikaŭ dapamohi, kab schavać ślady złačynstva. Jany pieranieśli pamierłuju, jaje asabistyja rečy, u pryčep motabłoka 30-hadovaha haspadara doma, vyvieźli cieła ŭ les i zakapali. Pa darozie nazad admyli motabłok ad kryvi, a, viarnuŭšysia, źniščyli ślady złačynstva.
Paśla taho, jak hetyja asoby patrapili ŭ pole zroku pravaachoŭnikaŭ, asnoŭny fihurant i haspadar doma vyrašyli pierachavać cieła. Mužčyny vykapali jaho i źmiaścili ŭ inšuju jamu. Zatym ablili haručaj sumieśsiu, padpalili, i praź niekatory čas zakapali.
Asnoŭnamu fihurantu kryminalnaj spravy pradjaŭlenaje abvinavačvańnie za zabojstva z chulihanskich namieraŭ i ździek nad trupam. Haspadaru doma, dzie adbyłosia zabojstva, — za ŭkryvalnictva asoby, jakaja ŭčyniła asabliva ciažkaje złačynstva, zbroi i śladoŭ ździajśnieńnia hetaha złačynstva i ździek nad trupam. Treciamu fihurantu — za ŭkryvalnictva asoby, jakaja ŭčyniła asabliva ciažkaje złačynstva, zbroi i śladoŭ ździajśnieńnia hetaha złačynstva.
