Fota Iryny Arachoŭskaj
Alena Iosifaŭna Hlebka ličyłasia najstarejšaj žycharkaj Minska — joj pavinna było sioleta spoŭnicca 114 hadoŭ. Ale viasnoj 2018 h. vyśvietliłasia, što žančyny nie stała jašče ŭ 1988 hodzie. Jaje syn Piotr schavaŭ śmierć maci i 30 hadoŭ atrymlivaŭ piensiju pa padroblenych dakumientach. Suprać mužčyny była zaviedziena kryminalnaja sprava za machlarstva. Pad vartu jaho nie źmiaščali, bo padazravanamu było 75 hadoŭ. Ale jamu pahražała da siami hadoŭ pazbaŭleńnia voli. Adnak mužčynu tak i nie sudzili. Finance.tut.by daviedaŭsia, čym ža skončyłasia hetaja historyja.
Rasśledavańnie pa hetaj dziŭnaj spravie ŭžo zavieršana. A dakładniej, pryniata rašeńnie jaho spynić pa abjektyŭnych pryčynach. Padazravanamu było 75 hadoŭ, jaho nie zatrymlivali.
— Śledstvam pryniata rašeńnie ab spynieńni rasśledavańnia ŭ suviazi z tym, što padazravany padčas papiaredniaha śledstva pamior, — raspaviała Julija Hančarova, aficyjny pradstaŭnik Śledčaha kamiteta.
— Što tyčycca abstavinaŭ spravy, to jany ŭ chodzie śledstva ŭstanoŭleny. Śmierć maci padazravanaha nastupiła jašče ŭ 1988 hodzie. Z hetaha času mužčyna atrymlivaŭ jaje piensiju pa davieranaści. Havorka idzie nie pra adnu davieranaść. Pieryjadyčna jon atrymlivaŭ davieranaści, jakija dajuć prava na rasparadžeńnie piensijnym układam, u roznych orhanach — ŽES, ŽREA, jakija mieli prava ich vydačy.
Aficyjny pradstaŭnik SK kaža, što ŭ chodzie śledstva ŭ adnu kryminalnuju spravu było złučana 20 kryminalnych spraŭ.
— Što tyčycca sumy škody, naniesienaj upraŭleńniu sacyjalnaj abarony administracyi Maskoŭskaha rajona Minska, jana skłała bolš za 43 tysiač rubloŭ [pavodle papiarednich acenak, škoda aceńvałasia prykładna ŭ 100 tysiač rubloŭ — tut.by], — praciahvaje Julija Hančarova. — Heta škoda inkryminavałasia śledčym z 1991 hoda pa 2018 hod — pa momant vyjaŭleńnia dadzienaha złačynstva. Ustanavić škodu z 1988 pa 1991 hoda nie było mahčymym z pryčyny taho, što Nacyjanalny statystyčny kamitet Respubliki Biełaruś nie maje dadzienych ab indeksie spažyvieckich cen za nazvany pieryjad.
Syn Aleny Iosifaŭny Piotr pierajechaŭ u Minsk užo daŭno, žyŭ u dvuchpakajovaj kvatery ŭ piacipaviarchoviku niedaloka ad stancyi mietro «Hrušaŭka». Z usich dziaciej Aleny Iosifaŭny ciapier žyvaja tolki siastra Piatra Maryja Ściapanaŭna. Jana žyvie ŭ adnoj ź viosak u Hrodzienskaj vobłaści i ničoha nie viedała ab machinacyjach brata — žančyna nie bačyła jaho kala 30 hadoŭ.
— Mama pamierła ŭ 1988 hodzie. Jana žyła ŭ brata ŭ Minsku, a kali jon zvarjacieŭ, ja jaje zabrała da siabie. Brat złavaŭsia na jaje, jana z-za jaho časta płakała. Ja pahladzieła, što joj tam drenna, i pryjechała pa jaje, dakładna ŭžo nie pamiataju, u jakim hodzie heta było. Kali pamierła, ja sama jaje pachavała i pomnik pastaviła. Jaje mahiła ŭ mianie ŭ vioscy na mohiłkach, — raspaviadała nam piensijanierka. — Brat navat nie viedaje, dzie i kali jana pachavana, bo nie pryjazdžaŭ u viosku ŭžo bolš za 30 hadoŭ.
Taksama Maryja Ściapanaŭna kazała, što ŭ Piatra jość dzieci.
