president.gov.by
Alaksandr Łukašenka nie bačyć nieabchodnaści ŭ stvareńni vajennych baz inšych dziaržaŭ, u tym liku Rasii, na terytoryi Biełarusi.
Ab hetym kiraŭnik biełaruskaj dziaržavy zajaviŭ siońnia na sustrečy z hrupaj amierykanskich analitykaŭ, pieradaje pres-słužba kiraŭnika krainy.
Łukašenka zhadaŭ i pra toje, što Biełaruś znachodzicca ŭ vajennym sajuzie z Rasijaj, u jakoj adnosiny z Zachadam u ciapierašni čas nie samyja lepšyja. «Tym nie mienš, na terytoryi Biełarusi da hetaha času niama nijakich baz inšych dziaržaŭ», — zaŭvažyŭ biełaruski kiraŭnik.
Pavodle jaho słoŭ, vielmi časta abmiarkoŭvajecca prablema rasijskaj bazy na terytoryi Biełarusi. «Nadumanyja prablemy. My ŭ vajenna-palityčnym sajuzie z Rasijaj. Budzie tut baza vajennaja, nie budzie — roźnicy absalutna nijakaj niama. I my hetuju bazu nie raźmiaščajem tut nie tamu, što my chočam vam ci kamu-niebudź pakazać, što my suvierennyja i niezaležnyja. My jaje nie raźmiaščajem, bo jana tut nie patrebna. My sami pa našaj zadumie, vajennym abarončym płanie z Rasijskaj Fiederacyjaj zabiaśpiečym tyja funkcyi, jakija na nas uskładzieny», — padkreśliŭ jon.
«Bolš za toje, našy vajskoŭcy ŭ stanie efiektyŭna supraćstajać, kali treba, luboj ahresii i kanfliktu na terytoryi Biełarusi. Bo my na svajoj ziamli. My ŭ stanie vykanać tyja funkcyi, jakija na nas uskładzieny damovaj z Rasijaj. Kali b my heta nie mahli zrabić, paviercie, my źviarnulisia b sami da Rasii, kab jany harantavali nam biaśpieku. Pakul takoj patreby ŭ nas niama», — zajaviŭ kiraŭnik dziaržavy.
Alaksandr Łukašenka taksama adznačyŭ, što Uzbrojenyja siły Biełarusi, jakija ŭžo čatyry razy refarmavanyja, u stanie harantavać biaśpieku krainy i vykanać svaje funkcyi lepš, čym lubaja inšaja dziaržava, u tym liku Rasija.
«Pa svajoj padrychtavanaści, metanakiravanaści, svajoj efiektyŭnaści. Ja kažu heta adkryta. Tamu nam nie patrebnyja nijakija bazy. Kali jany patrebnyja buduć, my pra heta skažam sumlenna», — adznačyŭ jon.
Adnačasova jon padkreśliŭ, što kali NATO budzie praciahvać «zapałochvać», raźmiaščajučy bazy ŭ Polščy, albo jašče jakim-niebudź čynam, to Biełarusi budzie treba bolš efiektyŭnaja zbroja, pierš za ŭsio rakietnaja.
«Choć u apošni čas (vy nazirajecie, my taksama nie ŭtojvajem) my stvaryli svaju rakietnuju pramysłovaść i zrabili svajo vysokadakładnaje rakietnaje ŭzbrajeńnie», — źviarnuŭ uvahu Alaksandr Łukašenka.
«Tamu na siońniašni dzień ja navat nie baču niejkaj nieabchodnaści ŭ pryciahnieńni inšaj dziaržavy na terytoryju Biełarusi, u tym liku Rasii, dla vykanańnia našych funkcyj. Voś čamu my kateharyčna suprać raźmiaščeńnia, tym bolš bazy vajenna-pavietranych sił. Čas padlotu luboha samalota z terytoryi Rasii, kali ŭ hetym budzie nieabchodnaść, 3—5 chvilin. Navošta tady tut baza, navošta vystaŭlać i padstaŭlacca pad udar mahčymaha ahresara, vysoŭvajučy vajenna-pavietranuju bazu na pieradavuju», — zajaviŭ kiraŭnik dziaržavy.
Jon dadaŭ, što razmovy ab vajskovaj bazie Rasii źjaŭlajucca nie bolš čym bałbatnioj.
«Heta prosta niejki pijar niepatrebny. Z praktyčnaha punktu hledžańnia ŭ hetym niama nijakaj nieabchodnaści, - skazaŭ Alaksandr Łukašenka. — Treba budzie, my pra heta skažam hołasna. Ale my nie chočam inicyjavać nijakich krokaŭ, kab vy padumali, što biełarusy niejkija nienarmalnyja: kažuć adno, robiać inšaje i rychtujucca da vajny. My nie chočam hetaha ».
«Ale abaraniacca, kali treba, my budziem nie tak, jak u byłyja časy. Vy viedajecie, što my stracili ŭ apošniaj vajnie kožnaha treciaha. Darečy, vajavali razam z vami suprać fašyzmu», - dadaŭ biełaruski kiraŭnik.
Łukašenka taksama skazaŭ, što Biełaruś — jeŭrapiejskaja dziaržava, jakaja zacikaŭlena ŭ mocnaj i adzinaj Jeŭropie, u mocnym transatłantyčnym partniorstvie. «Heta asnoŭnaja apora našaj płaniety, i nie daj boh jaje razburyć», — dadaŭ jon.
«My ŭpeŭnienyja, što ad zhurtavanaści krain u rehijonie i zachavańnia vajenna-palityčnaj roli ZŠA ŭ jeŭrapiejskich spravach zaležyć biaśpieka ŭsiaho kantynienta», — padkreśliŭ Alaksandr Łukašenka.
president.gov.by
Pradstaŭniki analityčnych centraŭ ZŠA naviedvajuć Biełaruś 5-6 listapada. U skład delehacyi ŭvachodziać ekśpiert Centra pa analizu jeŭrapiejskaj palityki Ben Chodžes, staršy dyrektar Centra dypłamatyi i hłabalnych adnosin imia Dž. Bajdena Majkł Karpenter, ekśpiert analityčnaha centra RAND Corporation Brus Maklintak, prezident Džejmstaŭnskaha fondu Hlen Chovard i staršy navukovy supracoŭnik hetaha fondu Uładzimir Sokar.
Čytajcie taksama:
Łukašenka: Nie treba Polščy stvarać lišnija bazy, bo my z rasijanami taksama budziem vymušanyja niešta raźmiaščać
