U Biełarusi źmianili praviły prodažu asobnych tavaraŭ i pracy hramadskaha charčavańnia. Tak, kramy pavinny buduć paznačać ceny ŭ litrach i kiłahramach. Jašče adna źmiena tyčycca prodažu niepaŭnaletnim vyrabaŭ, kanstruktyŭna padobnych da pnieŭmatyčnaj i kidalnaj zbroi… TUT.BY pahladzieŭ, jakija źmieny padrychtavali dla pakupnikoŭ.
Košt tavaru buduć prapisvać za kiłahram i litr
Pastanova Saŭmina 14 listapada № 824 praduhledžvaje karekciroŭku praviłaŭ prodažu asobnych vidaŭ tavaraŭ i ažyćciaŭleńnia hramadskaha charčavańnia. Dakumient ustupaje ŭ siłu praz try miesiacy paśla jaho aficyjnaha apublikavańnia.
Niekatoryja sa źmien užo pracujuć na praktycy, ale pakul nie prapisany ŭ dakumientach. Adzin z takich prykładaŭ - ukazańnie na ceńnikach koštu tavaru za kiłahram i litr, što ŭžo ciapier robiać mnohija kramy.
Vyklučeńnie - tavary ŭ peŭnym nabory, ałkaholnyja, słabaałkaholnyja napoi i piva, jajki, a taksama charčovyja pradukty, masa abo abjom jakich składaje mienš za 50 hramaŭ abo 50 mililitraŭ.
Kramy buduć pradavać pradukty pa canie, paznačanaj na ceńniku
Źmienu ŭviali, kab «źniać kanflikty pakupnikoŭ z pradaŭcami ŭ vypadkach, kali padčas raźliku pakupnika staviać u viadomaść, što cana na tavar pavialičyłasia, ale «nie paśpieli pierapisać ceńniki».
Pradukcyju hramadskaha charčavańnia taksama abaviazany adpuskać pa canie, paznačanaj u mieniu.
Vyklučeńnie - vypadki prodažu tavaraŭ, pradukcyi hramadskaha charčavańnia pa nižejšaj canie.
Što źmienicca dla pasažyraŭ u ciahnikach
U ciahnikach — mižnarodnych, mižrehijanalnych linij i rehijanalnych linij biźnies-kłasa — dazvolać raznosny handal charčovymi praduktami. Hałoŭnaje patrabavańnie - zachavańnie vyznačanych zakanadaŭstvam umoŭ ich zachoŭvańnia i prodažu.
Biaspłatnaja ŭpakoŭka pavinna być jakasnaj
U kožnaj kramie, zhodna z praviłami handlu, pavinna być biaspłatnaja ŭpakoŭka. Ciapier dadajecca novaje patrabavańnie - kab biaspłatnaja ŭpakoŭka «zabiaśpiečvała zachavańnie jakaści i spažyvieckich ułaścivaściaŭ tavaraŭ».
Što źmienicca dla restaranaŭ i kaviarniaŭ?
Ŭstanovy hramadskaha charčavańnia pavinny buduć dać mahčymaść aznajomicca sa svaimi pasłuhami, koštami nie tolki ŭ zale, ale i pa-za joj.
Što źmienicca ŭ budaŭničych kramach
Kramy pry zhodzie pakupnika zmohuć nie praviarać kamplektnaść i dakumientacyju budaŭničych materyjałaŭ, «kali dla ažyćciaŭleńnia takoj pravierki nieabchodna raskryćcio ŭpakoŭki vytvorcy».
Pry hetym prapanujecca dazvolić pradaŭcu na svajo mierkavańnie adpuskać ci nie rasfasavanyja i spakavanyja vytvorcam u spažyvieckuju taru tavary paštučna, na vahu.
Z normaŭ ab prodažy budaŭničych materyjałaŭ vyklučyli pytańni rehulavańnia prodažu škła listavoha, jakija pradaviec moža vyznačyć samastojna.
Pnieŭmatyčnyja pistalety i revalviery - tolki z 18 hadoŭ
Dla kramaŭ taksama vyznačyli zabaronu prodažu niepaŭnaletnim kanstruktyŭna padobnych da pnieŭmatyčnaj i kidalnaj zbroi vyrabaŭ (pnieŭmatyčnyja pistalety, revalviery i vintoŭki, łuki i arbalety, za vyklučeńniem cacak). Na źmienie nastojvała MUS i asobnyja abłvykankamy.
Uzrostavyja abmiežavańni na nabyćcio cyvilnaj zbroi dziejničajuć i ciapier, heta praduhledžana artykułam Zakona «Ab zbroi». Zhodna ź im, zabaroniena pradavać zbroju niepaŭnaletnim (samaabarony, spartovuju, palaŭničuju i sihnalnuju).
Ale normy zakona nie raspaŭsiudžvajucca na kanstruktyŭna padobnyja da zbroi vyraby.
Staryja knihi zmohuć vystaŭlać pobač z novymi
Ŭviali źmieny taksama dla bukinistyčnych kramaŭ. Ciapier jany zmohuć vystaŭlać pobač novyja i staryja knihi.