Sioleta adznačajucca 85-ja ŭhodki Haładamoru.
Ambasadar Ukrainy ŭ Biełarusi Ihar Kizim u svajoj pramovie padziakavaŭ usim, chto pamiataje i chto pryjšoŭ raździalić bol ukrainskaha naroda.
Ihar Kizim (sprava) z Časovym Pavieranym ŭ spravach Karaleŭstva Niderłandaŭ u Biełarusi Paułam van Aastviejnam.
Ihar Kizim nazvaŭ Haładamor najvialikšaj trahiedyjaj ukrainskaha narodu.
«Čatyry z pałovaj miljony čałaviek zahinuli za 1932-1933 hady va Ukrainie. Pačujcie hetuju ličbu tyja, chto sprabuje apraŭdać tahačasnuju palityku savieckaj dziaržavy. Pamierłych nazad nie viarnuć, ale my pavinny ahučvać imiony tych, z čyjho dazvołu ažyćciaŭlalisia strašnyja złačynstvy, my pavinny havaryć pra žachi stalinskaha režymu», — skazaŭ ambasadar.
Ihar Kizim nahadaŭ: u tym, što ŭkrainski narod vyžyŭ u tyja strašnyja časy, nie apošniuju rolu adyhrali i biełarusy, jakija pryniali ŭ siabie ludziej, što biehli z Ukrainy ad hoładu.
Śviedčańnie hetym słovam — pomnik u nievialikim miastečku Doŭsk, što na Homielščynie. Na simvaličnym kryžy, jaki adnavili sioleta, słovy: «My vyžyli, bo vy dapamahli».
«Heta historyja adnoj siamji z Čarkaščyny, — raskazaŭ Ihar Kizim, — Ich prytuliła miascovaja siamja, jakaja dzialisia z ukraincami chlebam. I za heta naša vializnaja ŭdziačnaść usim biełarusam».
Paśla Ihar Kizim raskazaŭ «Naša Nivie», jak škaduje, što nie moža ŭ svaich dziadoŭ spytacca, jak jany vyžyli ŭ Haładamory. Dziady ambasadara Ukrainy zahinuli padčas vajny.
«Adnak ja viedaju, što heta trahiedyja zakranuła siemji maich siabroŭ. Mnie raskazvaŭ adzin znajomy, što jon vyžyŭ tolki dziakujučy tamu, što jaho baćki advieźli na vakzał u Charkavie, tam pakinuli. A milicyja zabirała dziaciej na vakzałach i advoziła ŭ dziciačyja damy. Jon vyžyŭ. Kab zastaŭsia ŭ rodnaj vioscy, zahinuŭ by, jak usia jaho siamja».
Paśla Ihar Kizim patłumačyŭ, čamu jaho pramova była začytanaja na roznych movach:
«Kab usie zrazumieli toje, pra što ja kažu. Ja bačyŭ siońnia ŭ zale ambasadaraŭ z 10 krain, a dypłamataŭ z roznych ambasad jašče bolš. Pryjšli ambsadary Niderłandaŭ, Złučanych Štataŭ, Šviecyi, Narviehii, Rumynii. Treba skazać, što ŭ hety ž čas ich zaprašaŭ da siabie ambasadar Rasii, ale jany vybrali Ukrainu, pryjšli ŭšanavać pamiać, a nie paviačerać z ambasadaram Rasii. Heta pakazalna».
U subotu ŭsia Ukraina roŭna a 16-j hadzinie zapalić śviečki pamiaci pa achviarach Haładamoru.
