Ruch «Hramadzianie Polščy» vykazaŭ pratest suprać maršu nacyjanalistaŭ, što pavinien prajści ŭ polskaj Hajnaŭcy 23 lutaha. U Hajnaŭcy žyvie pieravažna pravasłaŭnaje biełaruskaje nasielnictva.
«Zastrelenyja, spalenyja, rasstralanyja» — heta słovy z rasśledavańnia polskaha Instytuta nacyjanalnaj pamiaci (poł. IPN) datyčna 79 žycharoŭ Bielskaha pavieta, zabitych zimoj 1946 hodu pa zahadzie Ramualda Rajsa «Buraha», polskaha sałdata Armii Krajovaj, kiraŭnika apieracyj suprać pravasłaŭnaha nasielnictva Padlašša», — havorycca ŭ zvarocie.
«Siońnia my, ruch «Hramadzianie Polščy» (poł. Obywatele RP), kładziom pierad saboj 79 biełych ruž, šanujučy pamiać našych zabitych suhramadzianaŭ. Nasuprać maršu nacyjanalistaŭ u Hajnaŭcy my staim ź biełymi ružami ŭ rukach, u cišyni i spakoi, uspaminajučy achviar «Buraha» i inšych kamandziraŭ polskaha padpolla, jakija sprabavali vyniščyć svaich suhramadzianaŭ pa nacyjanalnaj ci relihijnaj prykmiecie», — padkreślivajecca ŭ zajavie.
«Biełyja ružy ŭ našych rukach — heta zaklik da čałaviečaj hodnaści, spraviadlivaści i sumlennaści. Sumlennaściu i pamiaćciu, biez nasilla, my chočam spynić nacyjanalizm u Polščy. My robim heta nie tolki ŭ Hajnaŭcy, a ŭ kožnym miescy, dzie hodnaść luboha polskaha hramadzianina topča ŭłada svaim patakańniem nacyjanalizmu. U minułym hodzie my pratestavali suprać nacyjanalistyčnych maršaŭ u šmat jakich miescach Polščy i častkova my damahlisia pośpiechu: niekatoryja ź ich, u tym liku ŭ Varšavie, byli zabaronieny».
***
Nahadajem, što dniami akruhovy sud u Biełastoku skasavaŭ rašeńnie burmistra Hajnaŭki zabaranić marš pamiaci «žaŭnieraŭ vyklentych». Marš maje adbycca 23 lutaha, kali ŭ Polščy adznačajuć dzień pamiaci antynacysckaha i antysavieckaha padpolla i Armii Krajovaj.
U Hajnaŭcy marš vyklikaje abureńnie častki žycharoŭ. Svaimi karnymi akcyjami partyzany «Buraha» ŭ 1946—1947 hadach sprabavali adstrašyć ludziej ad supracy z kamunistyčnymi ŭładami i vyklikać vyjezd pravasłaŭnych z Padlašša ŭ BSSR.
