Na aŭtadarozie Viciebsk — Lozna pieraviarnuŭsia lehkavik, pasažyry kinuli paranienaha kiroŭcu, a toj prajšoŭ 10 kiłamietraŭ, pakul nie ŭpaŭ bieź sił. Jaho vyratavaŭ milicyjanier, paviedamlaje UUS Viciebskaha abłvykankama.
U milicyju pastupiła paviedamleńnie, što ŭ rajonie adnoj ź viosak u kiuviecie lažyć aŭtamabil. Inśpiektary adpravilisia na miesca DTZ. Užo na padjeździe da miesca avaryi jany sustreli «MAZ» darožnikaŭ, jakija i vyjavili lehkavik. Akazałasia, što razam z kiroŭcam jechali dva pjanyja chłopcy, jakija pa darozie paprasili padvieźci ich.
Kapitan milicyi Dźmitryj Łazuka źviarnuŭ uvahu na adnaho z pasažyraŭ. Mužčyna byŭ zapeckany kryvioju, pry hetym bačnych ran na jaho ciele nie było. Milicyjant spytaŭ, čyja heta kroŭ i ci byŭ u ich kampanii treci, toj, chto siadzieŭ za rulom mašyny, jakaja patrapiła ŭ avaryju. Chłopcy stali admaŭlać svoj udzieł u DTZ. Inśpiektar nie pavieryŭ im i vyrašyŭ znajści kiroŭcu. Milicyjanier ahledzieŭ pakarežany aŭtamabil i adpraviŭsia šukać jaho ŭładalnika. Jon abjechaŭ nie adzin kiłamietr miascovych daroh, a potym uvažyŭ mužčynu, što lažaŭ na darozie. Kali milicyjanier padyšoŭ da paciarpiełaha, toj užo nie moh samastojna ruchacca. Na hałavie mužčyny była kryvavaja rana.
Milicyjanier pasadziŭ skryvaŭlenaha mužčynu ŭ słužbovy aŭtamabil i pajechaŭ u najbližejšuju balnicu. Pa darozie milicyjanier razmaŭlaŭ z paciarpiełym, kab toj nie straciŭ prytomnaść.
Jak vyśvietliłasia paźniej, mužčyna byŭ pjany i nie mieŭ prava kiravańnia transpartnym srodkam. Paśla avaryi jaho kinuli pasažyry, a sam jon vyrašyŭ pakinuć miesca DTZ. Piatlajučy pa darohach z prabitaj hałavoj, jon zdoleŭ prajści amal 10 km, pakul kančatkova nie zabłukaŭ i nie straciŭ siły.
