Ramzan Kadyraŭ u intervju čečenskamu ahienctvu, jakoje vyjšła 7 žniŭnia, zajaviŭ, što kiravańnie imama Šamila, nacyjanalnaha hieroja mnohich kaŭkazskich narodaŭ, u XIX stahodździ na Kaŭkazie pryviało da skaračeńnia kolkaści čečenskaha naroda ŭdvaja, abvinavaciŭ jaho ŭ biedach svaich suajčyńnikaŭ i papraknuŭ u tym, što paśla hibieli čečencaŭ jon zdaŭsia ŭładam Rasijskaj impieryi dziela ŭłasnaj vyhady.
Šamil byŭ trecim imamam Dahiestana z 1834 pa 1859 hod. U 1840-m jon vyrašyŭ abjadnać horcaŭ Zachodniaha Dahiestana i Čačni i stać taksama imamam Čačni. Z 1840-ha vajavaŭ z carskaj armijaj, pakul nie trapiŭ u pałon u 1859-m padčas uziaćcia auła Hunib u Dahiestanie.
Vykazvańnie Kadyrava było niehatyŭna ŭspryniata ŭ Dahiestanie. U muftyjacie hetaj respubliki zajavili, što imam «usiaho tolki adstojvaŭ na praciahu 25 hadoŭ baćkoŭskija damy i ziemli svaich bratoŭ».
Bolš za 100 čałaviek sabralisia ŭ Machačkale kala budynka Avarskaha teatra z-za zajavy Kadyrava.
U noč na 8 žniŭnia ŭ sacyjalnych sietkach źjavilisia paviedamleńni z zaklikam vyjści na akcyju. Pa słovach udzielnikaŭ pratestu, kali zdareńnie pakinuć biez uvahi, to heta prynizić žycharoŭ respubliki i ich prodkaŭ.
«My pryciahniem chłusaŭ da adkaznaści, ale ŭ ramkach zakona i biez pravakacyj», — havorycca ŭ zaklikach.
Paźniej Kadyravu pryjšłosia rastłumačyć svaje słovy dahiestancam.
Pamočnik deputata rasijskaj Dumy, dahiestanski hramadski dziejač Bułač Čankałajeŭ apublikavaŭ na svajoj staroncy ŭ Instagram niekalki videazapisaŭ, na jakich možna pabačyć, jak jon abmiarkoŭvaje z kiraŭnikom Čačni Ramzanam Kadyravym jaho skandalnaje intervju.
«Ja viedaju, što dahiestancy ličać jaho svaim kumiram, hierojem, jak ja mahu skazać pra našaha musulmanina drennaje… Navat kali b ja drenna dumaŭ pra imama Šamila, ja pry sabie pakinuŭ by hetaje mierkavańnie», — skazaŭ Kadyraŭ.
Pa słovach kiraŭnika Čačni, jaho słovy byli niapravilna interpretavanyja.
«Žurnalisty jany ž razumnyja, jany pa-svojmu napisali tam», — dadaŭ jon. Udzielniki razmovy vykazali mierkavańnie, što Kadyravu varta było prakantralavać žurnalistaŭ.
Palityk taksama adznačyŭ, što «zaŭsiody byŭ z narodam» i maje ŭ Dahiestanie šmat blizkich jamu ludziej.
