Pra zdareńnie, što adbyłosia ŭ Žłobinskim rajonie, paviedamiła ŭ telehram-kanale MUS pres-sakratarka Volha Čamadanava.
U milicyju ranicaj 26 žniŭnia patelefanavaŭ dyrektar Pirevickaj škoły. Jon paviedamiŭ, što ŭ škole znachodzicca małoje dzicia biez darosłych. Pra siabie chłopčyk paviedamiŭ tolki proźvišča i imia, a taksama ŭzrost (6 hadoŭ).
Vyśvietliłasia, što chłopčyka pryviała ŭ škołu žančyna ź vioski Sałtanaŭka. Jana, u svaju čarhu, raspaviała, što dzicia znajšła kasirka čyhunačnaj stancyi. Chłopčyka supravadžaŭ małady mužčyna, jaki, sa słoŭ kasirki, byŭ pjany. Pakinuŭšy chłopčyka na pieronie stancyi «Sałtanaŭka», mužčyna sieŭ u ciahnik i źjechaŭ.
Žančyna zabrała da siabie chłopčyka, bo jaho jana nie raz bačyła: jon časta zachodziŭ u kramu razam z mamaj. Žančyna paviedamiła, što siamja pryjazdžaje ŭletku na daču. Adnak dom, u jakim pražyvała siamja, byŭ zamkniony.
Dzicia časova źmiaścili ŭ prytułak da ŭstanaŭleńnia miesca znachodžańnia baćkoŭ.
Da pošuku baćkoŭ padklučylisia inśpiektary pa spravach niepaŭnaletnich. Z razmovy z chłopčykam stała viadoma, što sam jon pražyvaje z baćkami ŭ Rasii, a na stancyju jaho pryvioŭ dziadźka Słava. Paśla supracoŭniki milicyi źviazalisia sa svajakami i ŭdakładnili, što maci doma adsutničaje i pavinna znachodzicca ŭ Žłobinskim rajonie razam z synam na dačy. Źviazalisia z baćkam, jon pryjechaŭ i zabraŭ syna.
Da doma ŭ v. Kruhaviec, vyjechała śledča-apieratyŭnaja hrupa.
Padčas ahladu prylehłaj da doma terytoryi byŭ znojdzieny prysypany ziamloj trup žančyny. Susiedzi paćvierdzili, što heta mama chłopčyka.
Apieratyŭniki kryminalnaha vyšuku Žłobinskaha RAUS vyśvietlili, što ŭ vioscy Kruhaviec pražyvaŭ 33-hadovy Słava, jaki padpracoŭvaŭ na padvorkach u miascovych žycharoŭ. Ale ŭ apošnija dni jaho nichto nie bačyŭ.
Na praciahu piaci dzion supracoŭniki milicyi pravodzili vyšuk 33-hadovaha Słavy, jaki, sa słovaŭ vidavočcaŭ, kupiŭ bilet i źjechaŭ. Siońnia jaho zatrymali pa padazreńni ŭ zabojstvie zhadanaj žančyny (mamy chłopčyka).
Ciapier z padazravanym pracujuć śledčyja. Zaviedziena kryminalnaja sprava.
