Stvareńnie adzinaj sistemy padatkovaha administravańnia Rasii i Biełarusi abmiarkoŭvałasia ŭ ramkach prahramy ekanamičnaj intehracyi dźviuch krain, raspaviała namieśnica ministra pa padatkach i zborach Biełarusi Eła Sialickaja RBK paśla pasiadžeńnia Kaardynacyjnaha savieta kiraŭnikoŭ padatkovych słužbaŭ dziaržaŭ SND.
19 listapada premjery Rasii i Biełarusi siem hadzin abmiarkoŭvali prahramu ekanamičnaj intehracyi. Nie ŭdałosia ŭzhadnić dziesiać z 31 darožnaj karty pa roznych halinach. Sprečki znoŭ vyklikali patrabavańni Minska pa kampiensacyi padatkovaha manieŭru i pa cenach na enierhanośbity. Płanujecca, što 8 śniežnia ŭ Maskvie — u dzień 20-hodździa padpisańnia Sajuznaj damovy — Uładzimir Pucin i Alaksandr Łukašenka ŭračysta zaćvierdziać vynikovy płan intehracyi.
U ramkach prahramy intehracyi, u pryvatnaści, abmiarkoŭvajecca raspracoŭka adzinaha padatkovaha kodeksu, paviedamlaŭ Uładzimir Makiej.
Jak patłumačyła RBK namieśnica ministra pa padatkach Biełarusi, padatkovaha administravańnia tyčacca dźvie darožnyja karty, pracu nad jakimi viaduć ministerstvy finansaŭ dźviuch krain.
«Da ŭčarašniaha dnia ŭ nas nie byli ŭzhodnieny pytańni pa padatkovym administravańni», — udakładniła jana. Abmiarkoŭvałasia stvareńnie adzinaj sistemy padatkovaha administravańnia dźviuch krain.
«Na moj pohlad, heta nie zusim treba, tamu što pieršapačatkova my viali razmovu pra intehravanuju sistemu padatkovaha administravańnia. Tamu što na terytoryi dźviuch krain užo stvorany aŭtamatyčnyja infarmacyjnyja sistemy. I kazać pra toje, što siońnia chtości pavinien usio pierabudavać i ŭziać za asnovu sistemu inšaj dziaržavy, na moj pohlad, nie zusim pravilna. Tamu što ŭkładzienyja srodki biudžetu, padatkapłacielščykaŭ, sistemy pracujuć, dajuć efiekt», — skazała Sialickaja.
«Uziać i ŭsio pamianiać — sensu niama, kali my bačym efiekt ad taho, što my ŭkaranili. Tamu, na naš pohlad, nam prosta patrebna jašče raz pieramoŭnaja placoŭka, dzie my mahli b znajści ahulnyja padychody pa hetych pytańniach», — zajaviła Sialickaja.
