U suviazi z maimi vystupami na mitynhach 7-ha i 8-ha śniežnia 2019 h. suprać mianie raspačaty administratyŭny praces pavodle artykuła 23. 34 KoAP Respubliki Biełaruś.
Admaŭlajučysia ad pasłuhaŭ advakata i bieručy na siabie hetuju rolu, što dazvolena mnie punktam 6 «Pravoŭ i abaviazkaŭ asoby, u adnosinach jakoj viadziecca administratyŭny praces», chacieŭ by jak advakat adkazčyka zrabić zajavu nastupnaha źmiestu.
Aznajomiŭšysia z tekstam pratakoła ab administatyŭnym pravaparušeńni, składzienym u Savieckim RAUS h. Minska 16.12.2019 h. i padpisanym inśpiektaram Tarlukom V. I. i načalnikam UUS administracyi Savieckaha rajona h. Minska Kalińnikam S. Ł., ja pryjšoŭ da vysnovy, što sudovaje pasiadžeńnie dla vyraku prysudu h-nu Sadoŭskamu pavinna być adkładziena dla dadatkovaha daśledavańnia pa nastupnych pryčynach:
- Pratakoł składzieny z raźlikam na toje, što mahčymy sudovy praces budzie prachodzić pa scenary, kali źmiest i sutnaść padrazhladnaj spravy budzie padmienieny farmalnym vymahańniem paćviardžeńnia padsudnym svajho udziełu abo niaŭdziełu ŭ padziejach, što pasłužyli nahodaj dla pačatku administratyŭnaha pracesu, jaki pavinien abaviazkova mieć svaim vynikam surovaje pakarańnie abvinavačanaha.
- Aŭtary pratakołu zusim nie abciažarvajuć siabie zachadami dla pravierki praŭdzivaści pakazańniaŭ śviedkaŭ, jakija, budučy słužboŭcami milicyi i źviedvajučy vyrazna administratyŭny cisk, dajuć časta zaviedama łžyvyja śviedčańni, tak by mović, na karyść dziaržavy.
- Dadatkovaje daśledavańnie pa spravie h-na Sadoŭskaha pavinna ŭtrymlivać praŭnuju acenku nie tolki dziejańniaŭ adkazčyka, ale taksama śviedkaŭ i słužbovych asobaŭ, datyčnych da ŭzhadanaha pratakoła, jakija abumoŭleny ahulnym stanam hramadstva.
- Pa sutnaści detalaŭ źmiestu pratakoła jak advakat patencyjna padsudnaha P. Sadoŭskaha maju zajavić nastupnaje:
a) Pašpartnyja i asabovyja źviestki pra h-na Sadoŭskaha padadzieny niedakładna. U pratakole ŭkazana, što jon maje siaredniuju adukacyju. Moj klijent maje vyšejšuju adukacyju — Minski dziaržaŭny in-t zamiežnych movaŭ. Jon kandydat navuk, dacent. Maje status Nadzvyčajnaha i Paŭnamocnaha ambasadara. Heta istotna dla śledstva. Bo ŭ pratakole jon pradstaŭleny jak razbersany chulihan, jaki «dieržał v rukach bieło-krasno-biełyj fłah i vykrikivał łozunhi «Žyvie Biełaruś». Źviartaju zaŭvahu ekśpiertaŭ-psichołahaŭ na styl śviedkaŭ, jakija pad dyktoŭku farmulavali paśpiešna svaje pakazańni: «Žyvie Biełaruś» — heta ŭsiaho adzin łozunh. Heta adzinočny lik. Da taho ž tut patrebny kličnik, bo abvinavačany pavodle pratakołu «kryčaŭ» hety łozunh. U pieršym vystupie 7-ha śniežnia Sadoŭski sapraŭdy, jak zakončyŭ śpiavać kupałaŭskuju pieśniu-marš «A ŭ bary-bary try darožańki», zakončyŭ svoj vystup uračystym vokličam «Žyvie Biełaruś!». Jon nie kryčaŭ, jon hołasna pramaŭlaŭ. Dla viedama milicyi: «Žyvie Biełaruś!» — heta słovy ź vierša Janki Kupały.
b) U pratakole niedakładna ŭkazany hod naradžeńnia majho klijenta. Jon naradziŭsia 2 lutaha (u hety ž dzień naradziŭsia i Kastuś Kalinoŭski) 1939 h., a nie 1941-ha. U pašpartnym adździele Frunzienskaha RAUS jość śviedčańnie-papraŭka 2007 h. z paćviardžeńniem dvuch śviedak pa miescy naradžeńnia P. Sadoŭskaha. Dla dziaciej časoŭ vajny dla papravak u stračanych paśviedčańniach ab naradžeńni dastatkova było pakazańniaŭ dvuch śviedkaŭ. Hetaja detal istotnaja dla vyznačeńnia miery pakarańnia: čałavieku ž 2-ha lutaha spoŭnicca 81 hod!
v) P. Sadoŭski nie «dieržał v rukie bieło-krasno-biełyj fłah» ni 7-ha, ni 8-ha śniežnia. Pieršy dzień u jaho nie było ničoha ŭ rukach. Druhi dzień u jaho ŭ rukach byŭ doŭhi parason z zakručanaj ručkaj, jaki jon časam biare z saboj u jakaści lasački jak užo nie małady čałaviek. Dla vyniasieńnia abvinavačańnia heta nie maje značeńnia: vinavaty va ŭdziele ŭ niedazvolenym mitynhu, — adkazvaj. Ale ž heta — uskosnaje śviedčańnie pra łžeśviedčańnie milicyjantaŭ. Jany ž nie mohuć pradstavić zdymkaŭ abvinavačanaha sa ściaham u rukach. Fatahrafii ž fihurujuć jak pradmiety dokazu pravaparušeńnia razam ź inšymi detalami (nierazborliva ŭ pratakole).
h) Druhi ŭskosny dokaz iłžeśviedčańnia hramadzian Štopa Andreja Ivanaviča i Cieraškoviča Ramana Siarhiejeviča (mahu pamylacca: napisana nierazborliva) — błytanina ŭ časie. Jany śviedčać, što 7-ha i 8-ha P. Sadoŭski byŭ na płoščy z 12 da 12.35. U hety čas jaho tam nie było. Niachaj pakažuć fatahrafiju, dzie na kamiery jość adbitak hetaha času. 7-ha śniežnia jon byŭ na płoščy chvilin 30—40. Źjaviŭsia pryblizna a 15-j. Pierad śpievami vybačaŭsia, što nie zusim zdarovy. Heta dobra vidać na zapisie z ukazańniem času. Adrazu pajšoŭ dadomu. 8-ha pryjšoŭ da mitynhoŭcaŭ pryblizna a 14-j. U 12-30 jon byŭ kala Pietrapaŭłaŭskaj carkvy. U jaho tam była sustreča. Śviedka moža paćvierdzić.
d) Nie admaŭlajučy, što jon źjaŭlajecca pierakananym praciŭnikam hibrydnaj ekanamičnaj ekspansii Rasii, P. Sadoŭski śćviardžaje, što niepasrednych zaklikaŭ suprać «intehracyi z Rasijaj» jon nie vykazvaŭ (heta inkluziŭna śćviardžajuć śviedki). Jon ličyć hety vyraz niaŭdałym žurnalisckim štampam, jaki vykarystoŭvajuć i dziaržaŭnyja i niedziaržaŭnyja miedyja. 8-ha śniežnia padsudny ničoha pra tak zvanuju intehracyju taksama nie ŭzhadvaŭ. Jon vystupaŭ jak fiłołah, analizujučy psichałahičny aśpiekt uździejańnia maniery vystupu prezidenta, kali jon u rasijskuju moŭnuju płyń pieryjadyčna ŭplataje frahmienty biełaruskaj movy, užyvajučy jaje vyklučna z admoŭnaj kanatacyjaj i supravadžajučy heta pierakryŭlenym vyrazam tvaru dy intanacyjaj. Heta jość, pavodle mierkavańnia hr-na Sadoŭskaha, raspalvańniem hramadzianskaj varožaści pavodle moŭnaj prykmiety. Na siońniašni dzień u Biełarusi faktar movy stanovicca palityčnym čyńnikam, miarkuje moj padabaronny.
d) Niekarektna zapoŭnieny punkt pratakołu, dzie pavinna być kankretna ŭkazana, ci pryciahvaŭsia raniej hramadzianin da adminstracyjnaj adkaznaści. Zamiest hetaha tolki napisana zahadkavaje dla šarahovaha hramadzianina skaračeńnie «hł. JEHBD» (peŭna, tak abaznačajecca adzinaja dziaržaŭnaja baza dadzienych). Treba było pisać: nie pryciahvaŭsia. Hety fakt istotna ŭpłyvaje na mieru pakarańnia. Hramadzianin Sadoŭski — zakonapasłuchmianaja asoba. Za 80 hadoŭ svajho žyćcia jon tolki dva razy byŭ u sudzie. Pieršy raz, kali vystupaŭ dakładčykam u Kanstytucyjnym sudzie jak člen kanstytucyjnaj kamisii (byŭ členam Prezidyuma VS) i kali byŭ zajaŭnikam pretenzij da VS z pryčyny niavypłaty zarobku pavodle rasparadžeńnia Alaksandra Łukašenki padčas jahonaj pieršaj kadencyi. U 1996 hodzie byŭ zaśviedčany «niesiabroŭski kantakt» majho klijenta ź nieviadomymi pradstaŭnikami siłavych dziaržaŭnych orhanaŭ (sudovaja sprava nie daviedziena da kanca) padčas haładoŭki deputataŭ apazicyi BNF suprać niezakonnaha refierendumu. Tady deputataŭ źbivała i vykidała z budynku VS nieviadomaje vajenizavanaje padraździaleńnie ŭ maskach.
- Jak advakat, prašu sud pry vyniasieńni administracyjnaha pakarańnia, kali heta budzie hrašovy štraf, dazvolić h-nu Sadoŭskamu vypłačvać jaho praciahłym terminam, vyličajučy ź piensii nie bolš jak 10% štomiesiačna. Pamier jahonaj piensii — trochi bolš za 500 rubloŭ. Akramia nieabchodnych srodkaŭ na charčavańnie i leki jamu treba da lipienia 2020 h. sabrać srodki dla ŭstalavańnia nadmahilla dla niadaŭna pamierłaj žonki.
- Prašu paviedamić majmu klijentu zahadzia pra datu adkładzienaha sudovaha pasiadžeńnia, kab u jahonych siabroŭ, u tym liku i byłych kalehaŭ pa pracy — vykładčykaŭ, nastaŭnikaŭ, dypłamataŭ, słužboŭcaŭ — byŭ čas prajavić svaju karparatyŭnuju salidarnaść. My ž žyviom u demakratyčnaj krainie. Hety administracyjny praces maje hłyboki sacyjalna-hramadzianski charaktar. U pratakole zapisana: V diejstvijach Sadovskoho P. V. otsutstvujet sostav priestuplenija. Sapraŭdy, jon nikoha nie zabiŭ, ničoha ŭ bujnym pamiery nie ŭkraŭ, padčas svaich vystupaŭ nie rabiŭ antykanstytucyjnych zajavaŭ.
Dumaju, usio vykładzienaje daje padstavy dla bolš hłybokaha razhladu kazusu hetaha administratyŭnaha pracesu. Heta — pryvatny vypadak z šerahu inšych, pra jakija hramadstva viedaje. U kožnaha času jość svoj Drejfus.
