U paniadziełak 3 lutaha, pieršy dzień svajho vizitu ŭ Biełaruś, ministr zamiežnych spraŭ Litvy Linas Linkiavičus sustreŭsia ŭ Minsku z pradstaŭnikami palityčnaj apazicyi i hramadzianskaj supolnaści.
Na sustrečy prysutničali palityki Stanisłaŭ Šuškievič, Mikoła Statkievič, Anatol Labiedźka, Aleś Łahviniec, Taćciana Karatkievič, lidar niezaležnaha prafsajuza REP Hienadź Fiadynič, abaroncy Kurapat Dzianis Urbanovič i Źmicier Kramianiecki, pravaabaroncy Aleś Bialacki, Aleh Hułak, kinarežysior Juryj Chaščavacki, šef-redaktar «Našaj Nivy» Andrej Dyńko, ekanamist, kiraŭnik daśledčaha centra IPM Alaksandr Čubryk.
Litoŭski ministr adznačyŭ niaźmiennaść pazicyi Litvy pa pytańniach pravoŭ čałavieka. Jon taksama adznačyŭ, što vykanańnie standartaŭ biaśpieki na Astravieckaj AES — u intaresach jak Litvy, tak i Biełarusi.
Pryjarytetnaj temaj dla ŭdzielnikaŭ sustrečy ź biełaruskaha boku było pytańnie niezaležnaści i suvierenitetu krainy.
Kankretniej, Aleś Bialacki adznačyŭ, što pytańnie niezaležnaści na siońnia klučavoje dla hramadzianskaj supolnaści i prainfarmavaŭ Linasa Linkiavičusa pra akcyi pratestu suprać intehracyi z Rasijaj, što adbylisia ŭ śniežni.
«Važnaja lubaja padtrymka palityčnaj i ekanamičnaj samastojnaści krainy, ale jana nie pavinna być biezumoŭnaj. Jana musić być mocna ŭviazanaja z pravami čałavieka ŭ Biełarusi, z krokami pa pabudovie demakratyčnaha hramadstva. Jość čyrvonyja linii, jakija biełaruskim uładam nielha parušać pry lubych abstavinach. U pryvatnaści, heta źjaŭleńnie novych palityčnych źniavolenych, masavyja represii suprać hramadskich aktyvistaŭ», — padkreśliŭ padčas sustrečy ź ministram zamiežnych spraŭ Litvy pravaabaronca.
Aleś Bialacki zaŭvažyŭ, što padpisańnie Bazavaj damovy pamiž ES i Biełaruśsiu, jakaja nieadnaznačna ŭsprymajecca siońnia litoŭskimi palitykami, umacavała b suvierenitet Biełarusi, uzmacniła by pazicyi hramadzianskaj supolnaści ŭ krainie i, u pierśpiektyvie, paspryjała b dyjałohu pa funkcyjanavańni Biełaruskaj AES.
Varta adznačyć, što pazicyi prysutnych na sustrečy apazicyjnych palitykaŭ, z adnaho boku, i hramadskich dziejačoŭ, z druhoha boku, davoli istotna razychodzilisia.
Naprykład, Alaksandr Čubryk zajaviŭ pra važnaść dyjałohu miž krainami Jeŭrasajuza i Biełaruśsiu, pryhadaŭšy prypavieść pra błudnaha syna.
Aleh Hułak adznačyŭ siłu prajeŭrapiejskich nastrojaŭ u biełaruskim hramadstvie i roźnicu ŭ hetym sensie miž Biełaruśsiu i Rasijaj.
Andrej Dyńko padkreśliŭ važnaść dyviersifikacyi krynic pastavak enierhanośbitaŭ dla Biełarusi.
U toj ža čas palityki padkreślivali svoj skiepsis adnosna realnych namieraŭ kiraŭnictva Biełarusi i jaho zdolnaści vykonvać abiacańni. Na ich dumku, mienavita ad kiraŭnictva Biełarusi sychodzić hałoŭnaja pahroza suvierenitetu krainy.
