Namieśnik staršyni rajvykankama vystupaje na «kokusie» ŭ Miorach, Viciebskaj vobłaść.
Pieradvybary kandydata ad apazicyi prachodziać u spakojnaj atmaśfiery, bieź pieraškod z boku ŭładaŭ.
I ŭ Haradku, i ŭ Viciebsku, i ŭ Miorach na prajmeryz prysutničali ideołahi miascovych vykankamaŭ, paviedamlajuć karespandenty «Našaj Nivy».
U pryvatnaści, u Miorach na «kokus» apazicyi pryjšoŭ namieśnik staršyni vykankama pa ideałahičnych pytańniach Valer Draba.
U svaim vystupie jon zajaviŭ, što ŭ ich rajonie apazicyju uklučajuć i ŭ vybarčyja kamisii i naziralnikami rehistrujuć. Jon zadaŭ pytańnie kiraŭniku Ruchu za svabodu Jurasiu Hubareviču, jak jon płanuje źmianiać vypłaty pa dohladzie za dziećmi. Vystupaŭ ideołah pa-biełarusku.
Praŭda, namieśnik staršyni byŭ adziny, chto padniaŭ ruku ŭ adkaz na pytańnie, chto ličyć, što ŭ Biełarusi vybary svabodnyja i spraviadlivyja.
Namieśnik staršyni vykankama taksama atrymaŭ biuleteń dla hałasavańnia. Adnak siarod padličanych biuleteniaŭ adzin vyjaviŭsia niesapraŭdny. Mahčyma, heta pradstaŭnik «viertykali» nie vybraŭ nikoha z kandydataŭ.
Na pieradvybarach u «biełaruskaj Ajovie», na Viciebščynie, jakaja hałasuje pieršaja, najbolšuju kolkaść hałasoŭ źbiraje ŭradženiec hetaha rehijona chryścijanski demakrat Pavieł Sieviaryniec. Jon vyjšaŭ na pieršaje miesca ŭ Viciebsku, Połacku i Navapołacku, Miorach.
U toj ža čas u Haradku pieramoh Jury Hubarevič. Apošni maje dobryja šancy na pieramohu na Bieraściejščynie, skul jon rodam.
A ŭ Homielskaj vobłaści tradycyjna mocnyja pazicyi Abjadnanaj hramadzianskaj partyi, novy lidar jakoj, padpałkoŭnik milicyi ŭ adstaŭcy Mikałaj Kazłoŭ taksama vystaviŭ svaju kandydaturu na pieradvybary.
Adnak možna mierkavać, što najbolšaja kolkaść udzielnikaŭ prahałasuje na prajmieryz u Minsku.
Na dumku naziralnikaŭ, prysutnaść ideołahaŭ nie pieradvybarach nijak nie śviedčyć pra hatoŭnaść uładaŭ dapuścić apazicyju da aficyjnaha palityčnaha pracesu. Heta, chutčej, demanstracyja apazicyjnaj častcy hramadstva, što ŭłady hatovyja i da jaho «prysłuchoŭvacca».
Spakojnaje staŭleńnie ŭładaŭ da pracedury pieradvybaraŭ nie aznačaje, što jany hatovyja pajści na prazrysty padlik hałasoŭ na samich vybarach. Pavieł Sieviaryniec adznačaŭ, što ŭ vypadku pieramohi jon ličyć hałoŭnym dabicca dopusku niezaležnych siabroŭ u vybarčyja kamisii i skancentruje na hetym svaje vysiłki jak adziny kandydat.
Lidar Kansiervatyŭna-chryścijanskaj partyi BNF Zianon Paźniak, jak i ŭ minułyja hady, zaklikaje bajkatavać vybarčuju kampaniju ad pačatku.
Lidar Biełaruskaha nacyjanalnaha kanhresu Mikałaj Statkievič źbirajecca vyłučać 30 kandydataŭ u prezidenty, kab pravodzić ahitacyju ŭ roznych miescach krainy.
Jak čakajecca, svaje kandydatury majuć vyłučyć i Aleh Hajdukievič, Andrej Dźmitryjeŭ abo Taćciana Karatkievič, jakija trymajucca ad apazicyi asobna, a taksama, mahčyma, Hanna Kanapackaja.
Jak čakajecca, vybary projduć pry kancy leta, moža być, na dzień naradžeńnia Alaksandra Łukašenki 30 žniŭnia.
