Brescki abłasny centr hihijeny i epidemijałohii abiacaŭ raźmiaščać infarmacyju pra kolkaść vypadkaŭ COVID-19 u vobłaści try razy na tydzień. Ale apošniaja takaja infarmacyja źjaviłasia na jaho sajcie 8 krasavika. A paśla i jana źnikła sa staronki.
Pavodle aficyjnaj statystyki, u Bresckaj vobłaści 10 dzion tamu, 8 krasavika, z karanavirusam špitalizavali 3 čałaviek. Heta danyja na 8:00 8 krasavika.
U toj ža dzień Brescki abłasny centr hihijeny, epidemijałohii i hramadskaha zdaroŭja apublikavaŭ na svaim sajcie nastupnuju statystyku:
«Pa stanie na 8:00 8 krasavika na terytoryi Bresckaj vobłaści vyjaŭlena 28 stanoŭčych testaŭ na COVID-19 u pacyjentaŭ z prykmietami vostraj-reśpiratornaj infiekcyi, jakija znachodziacca na špitalizacyi ŭ lačebnych ustanovach vobłaści, a taksama ŭ asobaŭ, jakija źjaŭlajucca kantaktami pieršaha i druhoha ŭzroŭniu.
U tym liku: Łuniniec — 17, Brest — 6, Stolin — 2, Baranavičy, Hancavičy, Janava — pa 1».
Na nastupny dzień paśla hetaha, 9 krasavika, staršynia Bresckaha abłvykankama Anatol Lis paviedamiŭ:
— Siońnia 222 čałavieki pad nahladam u stacyjanarach, hałoŭnym čynam u infiekcyjnym adździaleńni Bresckaj abłasnoj kliničnaj balnicy, karanavirus paćvierdžany ŭ 41 čałavieka ź ich, bolš za ŭsio ŭ Łuninieckim rajonie — 26, u Breście — 6.
U toj ža dzień Minzdaroŭja paviedamlała, što ŭ Bresckaj vobłaści špitalizavali 17 čałaviek.
Na pytańnie nakont pryčyny razychodžańnia ŭ źviestkach adkazu žurnalisty nie atrymali.
Urešcie, paviedamleńnie ad 8 krasavika vydalili z sajta Bresckaj abłasnoj sanstancyi.
Čamu tak stałasia? «Infarmacyi my nie dajom», — adkazaŭ «Našaj Nivie» Uładzimir Klacko, namieśnik kiraŭnika Bresckaha abłasnoha centra hihijeny, epidemijałohii i hramadskaha zdaroŭja.
Pa aficyjnaj infarmacyi, jakaja sychodzić ad Minzdaroŭja, pa stanie na 17 krasavika ŭ Bresckaj vobłaści było vyjaŭlena 112 vypadkaŭ karanavirusa.
