Miedalist Alimpijskich hulniaŭ pa fiechtavańni Ro Mijaki. Fota Isiej Kato, Reuters
Japonski fiechtavalščyk Ro Mijaki ŭładkavaŭsia kurjeram u słužbu dastaŭki ježy Uber Eats paśla pieranosu Alimpijskich hulniaŭ u Tokia ŭ 2020 hodzie praz pandemiju karanavirusa. Pa słovach Mijaki, takaja praca dazvalaje jamu zarablać hrošy, padtrymlivajučy siabie ŭ dobraj fizičnaj formie z-za pieramiaščeńnia na rovary. Pra jaho piša Reuters.
Ro Mijaki — siarebrany pryzior Alimpijskich hulniaŭ u Łondanie ŭ 2012 hodzie. Jon pavinien byŭ udzielničać u hulniach Tokia-2020, ale ich pieranieśli na 2021 hod. Praź pieranos Alimpijady Mijaki na čas admoviŭsia ad niekalkich sponsarskich kantraktaŭ: «Ja padumaŭ, što było b nachabstvam atrymlivać hrošy ŭ takoj situacyi».
U spartsmiena byli nazapašanyja źbieražeńni, ale paśla miesiaca izalacyi biez pracy i zaniatkaŭ sportam jon vyrašyŭ uładkavacca kurjeram u Uber Eats.
Pa słovach Mijaki, słužbu dastaŭki jon abraŭ z-za mahčymaści pracavać pa zručnym hrafiku, pry hetym padtrymlivajučy fizičnuju formu z-za pajezdak na rovary.
Pracujučy kurjeram, Mijaki zarablaje kala 19 dalaraŭ u dzień. Spartoviec kaža, što ryzyki zachvareć na karanavirus u Uber Eats praktyčna niama: «Ja pakidaju ježu pierad dźviaryma ludziej, tamu nie kantaktuju ź imi».
Mijaki źbirajecca praciahvać pracavać, kab finansava i fizična padrychtavacca da momantu, kali pandemija adstupić.
