Fota Nadziei Bužan
Karanavirus vyjavili amal u 100 śpiecyjalistaŭ na placoŭcy Biełaruskaj AES, pra heta paviedamiŭ kiraŭnik «Rasatama» Alaksiej Lichačoŭ u videazvarocie da supracoŭnikaŭ haliny.
«Na biełaruskaj placoŭcy, hety prajekt u nas u asablivym pryjarytecie, zafiksavana kala 100 incydentaŭ, kala 100 stanoŭčych testaŭ. Heta nie tolki našy [rasijskija] rabotniki, ale i pradstaŭniki biełaruskaha zakazčyka. Usie karancinnyja miery vykonvajucca, ale ja prašu kiraŭnictva AES, kurataraŭ prajekta jašče dadatkova ŭzmacnić pracu. U nas tam ciapier samaja haračaja para — na praciahu najbližejšych tydniaŭ my płanujem atrymać licenziju i vyjści na fizpusk, pry hetym maksimalna abaraniajučy i źbierahajučy piersanał», — skazaŭ Lichačoŭ.
Biełaruskija ŭłady pra ŭspyšku na Biełaruskaj AES nie paviedamlali. Biełaruś — adzinaja ŭ Jeŭropie kraina, jakaja nie publikuje statystyki pa rajonach i infarmacyi pra łakalizacyju ŭspyšak epidemii.
