Paśla vobšukaŭ na leciščy błohiera Siarhieja Cichanoŭskaha milicyja apublikavała videa. Na im vidać surjozny stos dalaraŭ, jaki lažyć na stale. Pry hetym milicyjanty razmaŭlajuć ź niejkaj žančynaj, mierkavana — mamaj błohiera Sofjaj Jafremaŭnaj.
Milicyja pytajecca: «Vašyja hrošy?» Žančyna adkazvaje: «Maje». I tłumačyć: «Zarablali. I ja zarablała, i syn zarablaŭ».
«Naša Niva» źviazałasia z mamaj Cichanoŭskaha. Sofja Jafremaŭna paćvierdziła — na videa jana.
«Razumiejecie, ja była ŭ šokavym stanie. Ja nie jeła, nie piła, nie spała… A heta ŭsio adbyvałasia pozna nočču, pravierki išli ceły dzień. Plus u mianie chvoraje serca i ja siabie vielmi kiepska adčuvała, — kaža 69-hadovaja žančyna.
— A kali jany pačali pytacca, ci maje hrošy, ja adkazała, što maje, pa adnoj pryčynie — ja nie ŭjaŭlała, jakija tam hrošy! Mnie spačatku pakazali trochi, a paśla dastali nieviadoma kolki! Ja była prosta ŭ šokavym stanie, razumiejecie?»
Na videa ŭsio ž vidać, što na stale lažyć vialikaja suma.
«Ale ž ja nie ŭjaŭlała kolki tam! U tym stanie ja nie razumieła ničoha. Tuju sumu, jakuju jany nazvali — 900 tysiač dalaraŭ — ja bačyła, moža, tolki pa televizary», — zapeŭnivaje Sofja Jafremaŭna.
