Paśla aryštu videabłohiera Siarhieja Cichanoŭskaha 29 traŭnia ŭ Horadni pa ŭsioj krainie pačalisia zatrymańni jahonych prychilnikaŭ. U noč na 4 červienia ŭ dom da fiermiera Alaksanra Vianhury, pra jakoha zdymaŭ siužet Cichanoŭski, uvarvalisia milicyjanty i ludzi ŭ cyvilnym, ahułam 18 čałaviek.
«Teror byŭ strašny! Nalacieli 18 milicyjantaŭ, ale ŭsie ŭ cyvilnym, uvieś dom — i moj, i maci — pastavili dahary nahami», — uzhadvaŭ Alaksandar Vianhura ŭ razmovie sa «Svabodaj».
U druhoj pałovie dnia 5 červienia fiermiera taksama zatrymali. Jon pajšoŭ u adździaleńnie milicyi, kab zabrać kanfiskavany padčas pieratrusu noŭtbuk. Na nastupny ž dzień jaho asudzili na 15 sutak.
Jak akazałasia, padčas načnoha pieratrusu maci fiermiera, Tamary Fiodaraŭnie, złamali palcy ruki, heta jana paćvierdziła Radyjo Svaboda. Jana chadziła na ekśpiertyzu, padała zajavu ŭ milicyju.
«Ja ŭžo bajusia choć niešta kazać, kab Sašu [synu] nie zrabili horš! Choć by jon vyjšaŭ z turmy… My raniej vieryli ŭ niešta — pijanieraŭ, kamsamoł… A siońnia kamu vieryć?! Vakoł svavola i strach! U mianie duša razryvajecca na kavałki — jak tam Saša, što ź im?!» — zaznačyła Tamara Fiodaraŭna.
Jana dadała, što ŭ tuju noč u jaje načavała ŭnučka, a nieviadomyja biehali pa chacie i šukali niekaha [paplečnika Cichanoŭskaha, Dzianisa Papova]. Jany ŭvarvalisia ŭ adzin z pakojaŭ, dzie spała ŭnučka, i nastavili na jaje pistalet. Ciapier dziaŭčynka mocna źlakanaja.
«Jość skarha Tamary Fiodaraŭny, ciapier z hetym raźbirajecca Śledčy kamitet, materyjały pravierki ŭ ich. Što datyčyć pahrozy prymianieńnia zbroi suprać niepaŭnaletniaj — takoha nie było, heta nie adpaviadaje rečaisnaści. Nijakich niepravamiernych dziejańniaŭ supracoŭniki nie rabili», — prakamientavaŭ «Našaj Nivie» zdareńnie pradstaŭnik MUS pa Homielskaj vobłaści Vital Prystromaŭ.
