Fota Minabarony
Ministerstva abarony Biełarusi ŭ svaim telehram-kanale abviarhaje infarmacyju inšych telehram-kanałaŭ pra pieravod u Minsk 70% składu 103-j mabilnaj bryhady (dysłakujecca ŭ Viciebsku).
«Čarhovy fejk ad telehram-kanałaŭ. Pišuć, što «70% składu 103-j mabilnaj bryhady z 18 lipienia znachodziacca ŭ Minsku. Buduć znachodzicca i paśla vybaraŭ. Im addadzieny adpaviednyja zahady». Ciažka ŭjavić, dzie možna schavać bolš za paŭtary tysiačy bravych desantnikaŭ (i heta tolki z adnoj bryhady), a hałoŭnaje — navošta ich chavać?» — havorycca ŭ paviedamleńni Minabarony.
Tam taksama zaznačajuć, što 1-2 žniŭnia ŭ Minsku projduć śviatočnyja mierapryjemstvy da dnia Pavietra-desantnych vojskaŭ. «Błakitnyja bierety ź Viciebska ŭ stalicu taksama prybyli, ich mienš bataljona — całkam dastatkova, kab vystupić na śviacie 1 žniŭnia», — adznačajecca ŭ paviedamleńni.
«2 žniŭnia 103 bryhada pa tradycyi rasčynić dźviery dla ŭsich žadajučych. Pierakanacca, što viciebskija desantniki na miescy, možna budzie navat asabista. Błakitnyja bierety čakajuć u hości ŭsich, ale rady buduć tolki tym, chto za svaje słovy adkazvaje», — adznačyli ŭ Minabarony.
