Pra heta zajaviŭ žurnalistam namieśnik ministra achovy zdaroŭja Dźmitryj Čaradničenka, piša BiełTA.
Jak paviedamlałasia, u suviazi sa źmianieńniem Padatkovaha kodeksa z 1 studzienia źmianiŭsia zakanadaŭča ŭstanoŭleny paradak spahnańnia PDV pa lekavych srodkach i miedycynskich vyrabach, što raniej vyzvalalisia ad takoha padatku, a mienavita: pry ich uvozie ŭ krainu ŭviedziena staŭka PDV 10%, što moža pryvieści da rostu cen na leki
«Ministerstva achovy zdaroŭja hatova da luboha dyjałohu i lubych prapanoŭ z boku ŭdzielnikaŭ farmrynku, tamu my ŭpeŭnieny, što nieabhruntavanaha pavyšeńnia cen na lekavyja preparaty nie budzie», — zapeŭniŭ Čaradničenka.
Pa jaho słovach, kiraŭnictvam Minzdaroŭja praviedzieny sustrečy z pradstaŭnikami Asacyjacyi mižnarodnych farmaceŭtyčnych vytvorcaŭ, ajčynnych kampanij, a 2 lutaha adbyłasia sustreča z dystrybjutarami, pradstaŭnikami značnych aptečnych sietak.
«My znajšli ahulnyja padychody i ŭbačyli razumieńnie (i z boku farmbiznesu, i ajčynnych vytvorcaŭ) važnaści toj prablemy, jakaja ciapier jość. I ŭsie vykazali zacikaŭlenaść u tym, kab jaje vyrašyć», — adznačyŭ namieśnik ministra.
Prapanavany kankretnyja zachady, jakija buduć vykonvacca. Vytvorcy lekavych preparataŭ pavinny źnizić adpusknyja ceny na 2 pracenty. Źmienšycca i pamier nadbavak, što prymianiajucca pry farmiravańni aptovych i roźničnych cen: na 2% na ŭzroŭni aptovaha źviana i na 5-6% na ŭzroŭni roźnicy. «Takim čynam my nivielirujem uviadzieńnie PDV, i indeks spažyvieckich cen, jaki ŭstanoŭleny na 2021 hod u pamiery 104,9%, budzie vykanany», - dadaŭ Dźmitryj Čaradničenka.
Jon udakładniŭ, što hety pakazčyk indeksa spažyvieckich cen ustanoŭleny dla lekaŭ, jakija naležać da katehoryi sacyjalna značnych. Da ich adnosiacca najbolš zapatrabavanyja nasielnictvam preparaty, u tym liku dla lačeńnia chvarob sardečna-sasudzistaj sistemy, cukrovaha dyjabietu. Na pieryjad pandemii heta procivirusnyja, procizapalenčyja leki, častka — antybijotyki. Pieralik karektujecca.
