Fota Depositphotos.com
Kaliści daŭno pracu śviatłafora vykonvaŭ čałaviek, jaki nakiroŭvaŭ transpart. Ciapier transpartnym rucham kiruje mašyna. Pryčym takaja, jakaja stanovicca ŭsio bolš razumnaj: u sučasnych śviatłaforach raźmiaščajuć štučny intelekt, jaki dazvalaje jašče lepš kiravać rucham. To-bok u niekatorych situacyjach ludzi ŭžo daŭno vykonvajuć zahady mašyny, piša BBC.
U apošnija hady ŭsio čaściej nazirajecca toje, što kampjutary kirujuć ludźmi na pracy. I na dumku ekśpiertaŭ, takaja tendencyja budzie tolki pavialičvacca.
Naprykład, taksi kampanii Uber. U ofisach kampanii niama nivodnaha čałavieka, jaki b razdavaŭ zahady kiroŭcam. Heta aŭtamatyčna robić prahramnaje zabieśpiačeńnie kampanii, u asnovie jakoha štučny intelekt.
Prafiesar Tomas Čamora-Premuzič (Tomas Chamorro-Premuzic), psichołah z Univiersiteckaha kaledža Łondana, śćviardžaje, što takaja sistema nie tolki robić servis maksimalna efiektyŭnym, ale maje i inšyja pieravahi.
«Dadatak Uber pazbaŭleny pieraduziataści ŭ adnosinach i da klijentaŭ, i da kiroŭcaŭ. Mienavita technałohii mohuć zrabić rynak pracy bolš mierytakratyčnym, bo jany zasiarodžvajucca na sutnaści, a nie na sacyjalnych charaktarystykach asoby. Takija kampanii stanuć najlepšym miescam dla pracy», — pierakanany Tomas Čamora-Premuzič.
Adnak jość i inšyja mierkavańni nakont kampjutaraŭ-načalnikaŭ. Šyvi Džervis (Shivvy Jervis), zasnavalnik kansałtynhu FutureScape 248, śćviardžaje, što nieabchodna nadavać uvahu etyčnaści štučnaha intelektu. «Technałohija, jakaja zdolna sama prymać rašeńni, moža stać pahrozaj u budučyni», — pierakanany ekśpiert.
Kampanija Amazon usio čaściej vykarystoŭvaje sistemy štučnaha intelektu dla manitorynhu piersanału. Heta pryviało da taho, što supracoŭniki pačali skardzicca na vialikuju zahružanaść, a takija sistemy raskrytykavali za niespraviadlivaść i pavyšanuju patrabavalnaść. Sama kampanija abviarhaje hetyja zajavy i śćviardžaje, što štučny intelekt dapamahaje supracoŭnikam i vučyć tych, chto nie daje rady zadačam.
Pakolki štučny intelekt vykarystoŭvajecca dla manitorynhu piersanału, vialikaja prablema ŭ tym, što kampjutar nie moža prymać kančatkovyja rašeńni, kali prychodzicca skaračać supracoŭnikaŭ. Naprykład, kali supracoŭnik adzin vychoŭvaje dziaciej, to mienšaja vierahodnaść taho, što jon trapić pad skaračeńnie. Adnak kampjutar nie moža praanalizavać padobnuju infarmacyju, kali treba vybirać taho, chto traplaje pad skaračeńnie.
