Malekularnyja bijołahi vyśvietlili, što pieršaje bujnoje źmianieńnie ŭ hienomie karanavirusa, mutacyja D614G, nie tolki pavialičyła jaho zaraznaść i ŭstojlivaść da choładu, ale i zrabiła jaho bolš uraźlivym. Vysnovy navukoŭcaŭ byli apublikavanyja ŭ artykule ŭ časopisie Science Advances.
«Ekśpierymienty pakazali, što mutacyja D614G pamianiała strukturu białkoŭ abałonki karanavirusa tak, što šancy na jaho ŭdałaje sčapleńnie z receptaram ACE2 i praniknieńnie ŭ kletku stali vyšejšyja. Adnak hetaja ž źmiena daje antyciełam bolš času i mahčymaściaŭ na złučeńnie z čaścicami SARS-CoV-2», — pišuć daśledčyki.
Pieršaje surjoznaje źmianieńnie ŭ hienomie karanavirusa navukoŭcy zafiksavali ŭ pačatku sakavika 2020 hoda, kali ŭ Jeŭropie pačali pašyracca novyja štamy. Ich charaktaryzavała ahulnaja mutacyja ŭ tak zvanym hienie S, jaki kiruje vytvorčaściu toj častki abałonki SARS-CoV-2, što niepasredna źviazanaja z praniknieńniem virusa ŭ arhanizm.
Ciapier hetuju mutacyju, D614G, znachodziać praktyčna va ŭsich raznavidnaściach karanavirusa, jakija cyrkulujuć siarod nasielnictva ŭsich kantynientaŭ Ziamli. Chutkaje pašyreńnie kaža, što jana moža być karysnaj dla karanavirusa. Adnak dakładny charaktar jaje ŭździejańnia na virus pakul całkam nie vyvučany.
Malekularnyja bijołahi pad kiraŭnictvam navukovaha supracoŭnika Nacyjanalnaj paskaralnaj łabaratoryi ŭ Łos-Ałamasie Sandrasieharama Hnanakarana detalova vyvučyli nastupstvy źjaŭleńnia hetaj mutacyi. Navukoŭcy vyjavili ŭ jaje raniej nieviadomuju rysu, jakaja moža pavialičvać efiektyŭnaść vakcyn i pryrodnaha imunitetu da SARS-CoV-2.
Navukoŭcy padrychtavali niekalki dakładnych virtualnych madelaŭ białkoŭ abałonki karanavirusa — z mutacyjaj D614G i bieź jaje. Dalej daśledčyki z dapamohaj supierkampjutara zmadelavali ich uzajemadziejańnie z receptarami ACE2 na pavierchni kletak lohkich.
Raźliki pakazali, što mutacyja prykmietna źmianiła toje, jak S-białok — klučavaja častka abałonki karanavirusa — razhortvajecca padčas jaho kantaktaŭ z kletkami. Hetaja malekuła składajecca ź dźviuch častak, S1 i S2. Pieršaja ź ich udzielničaje ŭ pracesie prymacavańnia virusa da miembrany niepasredna, a druhaja adkazvaje za jaje rastvareńnie i praniknieńnie virusnaj RNK u kletku.
Kab virus prymacavaŭsia da miembrany, treba, kab peŭnyja siehmienty S1 pryniali asablivuju prastoravuju kanfihuracyju, jakuju bijołahi nazyvajuć «vierchnim» stanoviščam. Čym bolš padobnych siehmientaŭ pierachodziać u hety stan, tym vyšejšyja šancy na toje, što adzin ź ich złučycca z kletkaj i prymacujecca da jaje.
Mutacyja D614G pavialičyła vierahodnaść taho, što adzin abo niekalki siehmientaŭ białku S1 pry zbližeńni z kletkaj piarojduć u vierchniaje stanovišča. Heta zrabiła virus bolš zaraznym, ale pry hetym pavialičyła vierahodnaść taho, što antycieły zmohuć dałučycca da inšych abłaściej abałonki SARS-CoV-2 jašče da taho, jak jon paśpieje prakraścisia ŭ kletku.
Padobnaja asablivaść virusa moža tłumačyć, čamu ŭsie isnujučyja vakcyny, raspracoŭka jakich pačałasia jašče da taho, jak źjaviłasia mutacyja D614G, dziejničajuć na jaje nośbitaŭ hetak ža efiektyŭna, jak i na pieršyja viersii SARS-CoV-2. Daśledčyki miarkujuć, što hetaj «achilesavaj piataj» karanavirusa možna skarystacca pry raspracoŭcy novych vakcyn i monakłanalnych antyciełaŭ.
