Čakajecca, što 28 krasavika mastaka Alesia Puškina etapujuć z Horadni ŭ SIZA № 1 Mienska. Žonka palitviaźnia Janina Puškina skardzicca na blakavańnie pierapiski ź im, piša Svaboda.
Pavodle telehram-kanału Belsat, horadzienskija śledčyja pieradali kryminalnuju spravu ŭ centralny aparat Śledčaha kamitetu. Imaviernaj pryčynaj pieravodu nazyvajuć toje, što «spravu Puškina» nibyta abjadnajuć sa «spravaj Sajuzu palakaŭ».
Siabra mastakoŭskaj supołki «Pahonia» Aleś Puškin amal miesiac znachodzicca za kratami, z 30 sakavika. Na jaho i kiraŭnika horadzienskaha Centru haradzkoha žyćcia Paŭła Mažejku zaviali kryminalnuju spravu za «reabilitacyju i apraŭdańnie nacyzmu». Nahodaj staŭ partret pavajennaha antysavieckaha partyzana Jaŭhiena Žychara, jaki mastak vyviesiŭ na vystavie. Mažejku praź niejki čas vypuścili, a Puškina źmiaścili pad vartu.
Žonka mastaka Janina Puškina ŭ razmovie sa Svabodaj paćvierdziła, što raniej abaroncy kazali joj pra chutki pieravod muža ŭ SIZA ŭ Miensk, ale nie było peŭnaści adnosna daty.
Pa jaje słovach, joj i dzieciam pakul nie viarnuli kanfiskavanyja padčas pieratrusu mabilnyja telefony i kamputarnuju techniku, choć u apošnija dni pryjšli niekalki listoŭ z adździełu prymusovaha vykanańnia Krupskaha rajonu.
Janina słaba vieryć u chutkaje vyzvaleńnie muža, choć sioleta ŭ siamji čakajecca značnaja padzieja — zakančvaje škołu syn Mikoła. Vypusknuju viečarynu planavali zahadzia, ale ciapier daviadziecca plany karektavać.
Janina pierakananaja ŭ mocy Alesia Puškina: «Heta nie jany jamu sudzilišča rychtujuć, a jon im», — miarkuje jana.
Janina Puškina paviedamiła, što za miesiac atrymała z turmy tolki adzin list ad muža — jakraz napiaredadni. Taksama adnojčy dajšoŭ ad Alesia list da jahonaj siastry i plamieńnicy. Z razmovaŭ z astatnimi svajakami i valanterami robić vysnovu, što ź imi listavańnie naŭmysna blakujecca — pošta viartajecca z paznakaj «adrasat nie isnuje». Jana padazraje, što i jaje listy nie dachodziać da muža, joj listy nie viartalisia, ale niama peŭnaści, ci dachodzili, bo ŭ atrymanym liście Aleś piša, nie pryviazvajučysia da jaje listoŭ, jak byccam ich nie było.
Pra toje, što ŭsie dopisy muža prachodzić cenzuru, śviedčać zakreślenyja «kramolnyja» vyrazy.
«U tym liście pra svoj pobyt jon ničoha nie paviedamlaje — mahčyma, kab dajšło choć u vychałaščanym vyhladzie. U asnoŭnym instrukcyi nam pa haspadarcy — kudy pajści, što zrabić, — uśmichajecca Janina. — Ale niejak prapuścili, dzie piša, što stvaryli cełuju kamisiju, kab fabrykavać jahonuju spravu. I ŭsie hetyja darmajedy buduć prajadać dziaržaŭny biudžet. Ale kolkaść «kamisaraŭ» zamazana asadkaj. Hetak ža ŭ liście da siastry, dzie jon aburaŭsia sytuacyjaj u krainie, zafarbavali słova «fašysty». Choć na śviatło ŭsio roŭna pračytvajecca».
Na pierakanańnie pravaabaroncaŭ, sprava Alesia Puškina maje palityčny charaktar i hruntujecca na idealahičnym padmurku savieckaj histaryjahrafii. Pravaabarončaja supolnaść pryznała tvorcu palitviaźniem.
U analahičnaj kryminalnaj spravie ab «raspalvańni rasavaj, nacyjanalnaj, relihijnaj ci inšaj varožaści i reabilitacyi nacyzmu» prachodzić i hrupa aktyvistaŭ niepryznanaha ŭładami Sajuzu palakaŭ. Padstavaj stała nieaficyjnaja impreza ŭ honar «praklatych žaŭnieraŭ», jakoje sioleta prajšło ŭ Bieraści.
Paśla hetaha Miensk i Varšava ŭzajemna vysłali dyplamataŭ, a ŭ Bieraści i Horadni zatrymali zasnavalnikaŭ aśvietnickaj inicyjatyvy «Polskaja škoła» i polskich aktyvistaŭ na čale z Anžalikaj Borys.
