«Pa sutnaści, była sproba dziaržaŭnaha pieravarotu. Tamu dziejańni pravaachoŭnych orhanaŭ i orhanaŭ ułady byli absalutna adekvatnymi i nieabchodnymi», — skazaŭ kiraŭnik biełaruskaj dypłamatyi.
Pa jaho słovach, vybar stajaŭ pamiž pravami čałavieka i zachavańniem dziaržavy. U takoj situacyi, upeŭnieny Makiej, kiraŭnictva luboj krainy zrabiła b taki samy vybar: «Na kartu byŭ pastaŭleny los krainy. I kali ŭ hetaj situacyi pastavić los krainy na adnu čašu šalaŭ, a na inšuju čašu šalaŭ tyja rečy, pra jakija vy kažacie, uklučajučy pravy čałavieka, ja pierakanany, što kiraŭnictva luboj krainy vybrała b zachavańnie niezaležnaści dziaržaŭnaści i suvierenitetu svajoj krainy. Mienavita heta i zrabili biełaruskija ŭłady».
Adkazvajučy na pytańnie pra 358 palitviaźniaŭ, kiraŭnik biełaruskaha MZS padkreśliŭ, što za kratami znachodziacca tolki ludzi, jakija parušyli zakon. Vypadkova zatrymanyja, pa jaho słovach, byli adpuščanyja. Pra toje, što ŭ Biełarusi prysudžajuć aryšt za škarpetki, łampasy i firanki, Makiej čamuści nie zhadaŭ.
Zatoje zahavaryŭ jon pra «sprobu pieravarotu», za jakuju zatrymali Fiadutu, Kastusiova, Ziankoviča i Hałubovič.
«Ni dla kaho nie sakret, što ŭsiaho niekalki dzion tamu śpiecsłužby Respubliki Biełaruś sumiesna z rasijskimi śpiecsłužbami raskryli zmovu suprać biełaruskich uładaŭ z metaj zabojstva kiraŭnika dziaržavy», — pachvaliŭsia kiraŭnik MZS. Jon dadaŭ, što «kalektyŭny Zachad» zamoŭčvaje hetuju spravu.
Darečy, na pačatku krasavika ŭ Biełarusi zabaranili viaščańnie Euronews, što stała niečakanaściu dla telekanała.
