Vyhladaje, što ŭsio heta — praciah historyi z bankructvam čyžoŭskaha «Trajpła». Patrabavańni banka źviazanyja z paručalnictvam za inšuju kampaniju «Prastora» — «Prastor-Trejd».
Hetaja kampanija ŭžo fihuravała ŭ niepryjemnaj historyi z Arena City na praśpiekcie Pieramožcaŭ. Sens schiemy byŭ taki: va ŭłaśnika majomaści — Biełahraprambanka, jakomu pamiaškańnie ŭ suviazi z kryzisam pierajšło pa damovie zvarotnaha lizinhu, — kampanija «Prastor-Trejd» brała ŭ lizinh pamiaškańnie kramy i pierazdavała jaho inšamu «Prastoru» — «Prastormarkietu», jaki płaciŭ abo mienš, abo z doŭhaj adterminoŭkaj, u vyniku čaho daččynaja kampanija zahaniałasia ŭ daŭhi pierad lizinhavaj.
U vyniku Ekanamičny sud Minska pryznaŭ nikčemnaj takuju damovu arendy, ciapier tam inšaja krama.
Vyhladaje, što historyja paŭtarajecca. Ciapier asnoŭnaja jurydyčnaja asoba «Prastora» nazyvajecca «Prastorrytejł».
Ale abaviazki daččynaj kampanii, jakija nie mohuć być pahašanyja, składajuć 37 miljonaŭ 871 tysiaču rubloŭ. Suma aktyvaŭ, jakija maje kampanija — 22 miljony 918 tysiač rubloŭ.
Vyhladaje, što ŭ hetaj sumie pavinna być nieruchomaść. Ale jakaja dakładna — pakul nieviadoma.
«Pakul mahu skazać tolki toje, što pravodzicca rabota, skiravanaja na pošuk majomaści kampanii», — ścisła skazali «Našaj Nivie» va ŭpraŭlajučaj spravy ab bankructvie kampanii «Kamilore».
Atrymać kamientaryj u «Prastora» nie atrymałasia. Syn Juryja Čyža, Siarhiej skazaŭ, što «jaho hetaje pytańnie bolš nie asabliva chvaluje».
Zhodna z praceduraj, ciapier najaŭnyja aktyvy pavinny być identyfikavany i pieradadzienyja banku.
Jak nam viadoma, kramy «Prastora» adna za adnoj mianiajuć vyvieski i znachodziać novych uładalnikaŭ — tak, zamiest ProStore ŭ HC «Horka Dom» na Kamiennaj Horcy ŭžo vosieńniu budzie pracavać «Karona». ProStore nie moh hasić svoj doŭh pierad bankami.
«U ProStore była vialikaja kredytnaja nahruzka, šmat budoŭlaŭ, nie vielmi dobryja apieratyŭnyja pakazčyki, pierakryžavanyja subsidyjarnyja adkaznaści, ahulnyja zakłady, da taho ž nieviadoma, u jakich pamierach hrošy sychodzili na finansavańnie inšych prajektaŭ «Trajpła», vynik zakanamierny», — kaža analityk z handlovych kołaŭ.
Ahułam u rytejle składvajecca biazradasnaja situacyja: viadoma pra zakryćcio niekatorych sietak («Domašnij», Biggz), a taksama składanuju situacyju ŭ «Vitalura» i «Jeŭraopta».
Čytajcie taksama: «Vitalur» ryzykuje paŭtaryć los «Domašnieho»? Pastaŭščyki padajuć na kampaniju ŭ sud
Čytajcie taksama: Straty 126 miljonaŭ, u biznes-kołach kažuć pra mahčymy prodaž rasijskamu «Mahnitu». Što adbyvajecca ź Jeŭraoptam?
Krynicy «Našaj Nivy» ŭ rytejle ličać, što halina sutyknułasia z surjoznym kryzisam.
«Mnohija aptaviki niejki čas tamu paličyli, što kali jany dobryja ŭ opcie, to jany buduć krutymi i ŭ roźnicy, pačali ŭłazić u budoŭli.
U vyniku aproč jasnaha markietynhu (u «Jeŭraopta» tannyja pradukty, u «Karony» — darahija), źjaviłasia šmat inšych hulcoŭ biez uciamnaj stratehii, jakija dumali, što dastatkova budzie prosta pastavić aptovy tavar na palicy.
I heta pracavała roŭna da taho času, jak rynak pačaŭ ściskacca ŭ suviazi z palityčnym i ekanamičnym kryzisam. Biznes zrazumieŭ, što kredyty treba addavać, ale niama čym — ludzi stali mienš kuplać. U mianie piesimistyčny prahnoz adnosna budučyni haliny, kolkaść udzielnikaŭ rynku mocna skarocicca», — kaža analityk.
