Mužčyna (jon pažadaŭ zastacca ananimnym) byŭ kiroŭcam pahruzčyka na składzie, dzie zachoŭvalisia pradukty — krupy, cukar, makarona, ałkahol, vada.
Ilustracyjny zdymak
«Ź ludziej pry zvalnieńni patrabujuć hrošy i biez padstaŭ prypisvajuć niejkija niedastačy. Skazali, što my pavinny pa 1200 rubloŭ addać za toje, što nibyta skrali, źjeli, raźbili (u raźlikoŭcy heta hrafa paznačana jak «pakryćcio škody». — «NN»). Prytym što ja vychodžu z pracy praz post achovy, sumki i kišeni praviarajuć, kab nie vynies ničoha.
Abo prapanoŭvali zvolnicca z raśpiskaj, što ja abaviazany spłacić peŭnuju sumu ŭ rasterminoŭku na šeść miesiacaŭ. Dy mnie heta naohuł nie treba — ja sumlenna pracavaŭ tam piać hod.
Ź mianie i tak vyličvali hrošy štomiesiac — my padpisvali dahavor ab materyjalnaj adkaznaści. Pačynałasia z 10 rubloŭ — nu tut ja zhodny, chtości pakiet cukru parvaŭ, chtości hrečki. A potym śpisańni raśli i dachodziła da 150 rubloŭ, biez anijakich tłumačeńniaŭ. My aburalisia, ale z nas hrošy ŭsio adno vyličvali.
Kali ja sam štości raźbivaŭ, išoŭ da achovy i składaŭ na hety tavar papieru, što tak, paškodziŭ, abaviazvajusia vypłacić usio. Takich aktaŭ štuk šeść za ŭvieś čas było, na sumy 20-30 rubloŭ.
Skład vielmi dobry dla pracy, kłasa «A+», ale ad hetaj historyi zastaŭsia asadak, što za naš košt straty pakryvajuć. Hetyja hrošy ja moh by patracić na svaju siamju.
Kryŭdna vielmi. Ja hałasavaŭ pravilna, ale voś u składanaj situacyi, i nichto zrazumieć nie choča. U fiederacyju prafsajuzaŭ pisali skarhu. Pieršy raz u ich naša papiera zhubiłasia. A druhi raz skazali, što nadta zaniaty: maŭlaŭ, u čarhu stanaviciesia, vas tut takich šmat. I ŭsio na hetym».
Što kažuć u łahistyčnym centry, dzie pracavaŭ naš čytač?
Mužčyna byŭ uładkavany ŭ łahistyčnym centry «24». U kadravym adździele kampanii «Našaj Nivie» patłumačyli, što jany dziejničali zhodna z pracoŭnym zakanadaŭstvam.
«Na składzie była invientaryzacyja. Pakolki rabotniki niasuć materyjalnuju adkaznaść pa kalektyŭnaj damovie, suma za niedastaču ci paškodžanyja tavary była śpisana z zarobku», — kažuć u adździele.
A što kaža juryst?
Pradukty sa składa, dzie pracavaŭ mužčyna, pryznačalisia dla handlovaj sietki. U vypadku kali tavary padčas zachoŭvańnia hublajuć jakaść, vydatki kładucca na łahistyčny centr. Tearetyčna heta suma moža śpisvacca za košt prybytku abo z rabotnikaŭ.
Juryst Alena Šynkarevič zaŭvažaje, što biez dakumientaŭ ciažka rabić vysnovy. Treba viedać, jakija pahadnieńni ab materyjalnaj adkaznaści padpisvalisia, jakija pieradavalisia materyjalnyja kaštoŭnaści, pahladzieć, što z rabotnikaŭ śpisali.
Kali naniesienuju škodu vyličvajuć z zarobku, suma śpisańnia nie moža być bolšaj za 50% ad jaho. Astatnija momanty zaležać ad taho, što paznačana ŭ dahavory.
Tamu kožnamu rabotniku važna pierad padpisańniem uvažliva pračytać kalektyŭnuju damovu.
