— Heta i zrazumieła: chvalujucca za siabie i za dzicia, — kaža zahadčyca palikliniki Vilejskaj CRB Taćciana Alaksandraŭna Ramiera. — Adnak daśledavańni pakazvajuć, što zaražeńnie virusam vielmi niebiaśpiečnaje dla ciažarnych. Kali žančyna zachvareje, jana moža navat zhubić dzicia.
Čytajcie taksama:
«Daktary skazali, što ja nie adna takaja». Ciažarnaja minčanka zachvareła na kavid — i straciła dzicia
Tamu vakcynavacca varta. Ale ž my nie možam nikoha prymusić. Tłumačym, pierakonvajem.
Tyja ciažarnyja, jakija ŭžo pryščapilisia, nie źviartalisia da nas z uskładnieńniami. Naturalnaj reakcyjaj arhanizma moža być tempieratura. Asabliva ŭ maładych žančyn, u jakich dobry imunitet. My ŭsich papiaredžvajem pra heta.
Pa słovach doktara, asablivaj roźnicy ŭ tym, na jakim terminie ciažarnaści pryščaplacca, niama. Adnak na 38-40 tydni rabić heta ŭžo niama sensu. Lepš pryščapicca paśla rodaŭ. Bo žančyny, jakija kormiać dzicia hrudnym małakom, dastatkova ŭraźlivaja dla virusaŭ katehoryja.
Taksama doktar raić ciažarnym pryščapicca i ad hrypu.
Heta siezonnaja chvaroba, jakuju nichto nie admianiaŭ. Preparatam vakcynujuć užo dziesiać hadoŭ. Jon dobra siabie zarekamiendavaŭ.
Jašče Taćciana Alaksandraŭna źviartaje ŭvahu na nastupnyja momanty:
— Časta možna pačuć: «Zrabiŭ pryščepku, a praź dzień-dva zachvareŭ. Pryščepka nie pracuje». Ale heta nie tak. Imunitet suprać chvaroby vypracoŭvajecca prykładna na dvaccaty dzień i tolki ŭ tych, chto zrabiŭ abiedźvie dozy vakcyny. Nie varta dumać, što zroblenaja siońnia pryščepka pačnie abaraniać vas zaŭtra.
— Chaču zajavić, što na Vilejščynie nichto nie pamior ad vakcyny. Časam miedyki, jakija chodziać pa damach vakcynavać ludziej u horadzie i na rajonie, čujuć: «A voś u adnoj vioscy niechta zrabiŭ pryščepku i pamior». Heta niapraŭda.
— Vakcyna nie vyklučaje zachvorvańnie na sto pracentaŭ. Adnak ryzyka ciažkich formaŭ i ŭskładnieńniaŭ u pravakcynavanych minimalnaja.
