Brežnieŭka na pieršym paviersie
Adnapakajoŭku ź niebłahim ramontam pradajuć niedaloka ad mietro «Partyzanskaja» (na vulicy Narodnaj). Brežnieŭka na pieršym paviersie, z maleńkaj kuchniaj, parkietnaj padłohaj i sumiežnym sanvuzłom. Možna zajazdžać i adrazu žyć. Praŭda, azdableńnie asnoŭnaha pakoja na amatara — u ružova-fijaletavych adcieńniach.
Za kvateru (płošča — 31,9 kvadratnaha mietra) prosiać 39 900 dalaraŭ. Pobač z panelkaj dva parki — 50-hodździa Vialikaha kastryčnika i imia Čynhiza Ajtmatava.
Standartnaja chruščoŭka
Jašče adzin varyjant niedaloka ad mietro «Partyzanskaja» (vulica Rajnisa). Płošča — 31,5 «kvadrata». Cana — 39,5 tysiačy dalaraŭ. Standartny dla «chruščoŭki»: staraja siekcyja, naciažnaja stol, farbavanyja ścieny ŭ vannym pakoi.
«Cichi, spakojny rajon, akružany zielaninaj», — havorycca ŭ apisańni. U kvartale — čatyry dziciačyja sadki, škoła i himnazii.
Minijaciurny varyjant
Za 38 tysiač dalaraŭ možna nabyć adnapakajoŭku ŭ rajonie mietro «Aŭtazavodskaja» (vulica Kabuškina). Cahlany dom 1970 hoda pabudovy (piać hod tamu byŭ kapitalny ramont), treci pavierch, śvietłyja pakoj i kuchnia. Addajuć z meblaj i pobytavaj technikaj.
Ale kvatera minijaciurnaja — 22,1 «kvadrata».
Ź vidam na les
Za hety biudžet možna nabyć małasiamiejku na ŭskrajku horada ŭ Zavodskim rajonie (vulica Hierasimienka). Kvatera na dziaviatym paviersie, stary ramont — ź linoleumam, antresolami i ŭbudavanymi šafami. Za 33 «kvadraty» prosiać 38 900 dalaraŭ.
Z bonusaŭ — vid na les z akna.
Soniečnaja kvatera
Voś taki varyjant vystaŭleny na prodaž kala Łošyckaha parku (vulica Soniečnaja). Cahlany dom 1970-ch hadoŭ, zašklony bałkon. Dobry ramont, choć, kaniečnie, kalarovaje rašeńnie — sprava hustu. Meblu i bytavuju techniku pakidajuć budučym žycharam.
Kvatera kaštuje 39 900 dalaraŭ.
Adnuška ź jeŭraramontam nulavych
Adnapakajoŭku ŭ chruščoŭcy za MKADam addajuć za 39 tysiač dalaraŭ. Vulica Šabany, da najbližejšaha mietro 15 chvilin na aŭtobusie. Interjer nahadvaje tak zvany jeŭraramont nulavych — arki ŭ prachodach, meblevyja harnitury z DSP. Ale ahułam kvatera hatovaja da pražyvańnia.
Płošča — 32 kvadratnyja mietry. U domie byŭ kapramont.
Ciomnyja interjery
Jašče adna chruščoŭka. Hetaja kvatera ź ciomnymi interjerami znachodzicca niedaloka ad mietro «Puškinskaja» (vulica Bieruta). U adnušcy pakidajuć šafu, žk-televizar, stoł-knihu i časopisny stolik. Z techniki zastajecca pralnaja mašyna, mikrachvaloŭka i ladoŭnia. Za adnapakajoŭku (32,2 «kvadrata») prosiać 39 tysiač dalaraŭ.
Novabudoŭla ŭ Hrušaŭcy
Za takuju canu možna znajści nie tolki druhasnaje žyllo, ale i novabudoŭlu. Naprykład, kala mietro «Hrušaŭka» — u žyllovym kompleksie «Minski kvartał». Svabodnaja płaniroŭka, sumiesny sanvuzieł, zašklonaja łodžyja. Za 26 «kvadrataŭ» treba vykłaści 40 tysiač dalaraŭ. Praŭda, kvatera jašče nie hatovaja. Płanujecca, što budaŭnictva skončać u nastupnym hodzie.
Studyja na luby hust
Sotni novych kvater pradajucca ŭ žyllovym kompleksie «Minsk Śviet». Zabudoŭščyk prapanuje papularny farmat — kvatery-studyi kampaktnaj płoščy. Niekatoryja ŭžo zdali, niekatoryja płanujuć zdać tolki ŭ 2023-m.
Tam možna znajści varyjanty ad 33 tysiač dalaraŭ. Za takuju canu pradajuć, naprykład, adnapakajoŭku płoščaj 27,6 «kvadrata».
***
Usiaho ŭ stalicy pradajecca bolš za 16 tysiač kvater (pa źviestkach Realt.by). Tańniej za 40 tysiač dalaraŭ prapanujuć 3,5 tysiačy varyjantaŭ. Ź ich kala sotni — doli ŭ kvaterach, try tysiačy — prapanovy ad «Minsk Śviet».
