Nahadajem, pavodle biełaruskich siłavikoŭ, «śmierć nie nosić traŭmatyčnaha charaktaru — na ciele pamierłaha nie vyjaŭlenyja paškodžańni ŭnutranych orhanaŭ, pierałomaŭ kostak».
«Jakaść zdymkaŭ drennaja. Ale, kali ščyra, ničoha krytyčnaha na hetych zdymkach ja nie baču. U vobłaści levaj nadbroŭnaj duhi padobna na ranku. I navat ciažka skazać, utvaryłasia jana pryžyćciova, ci ŭžo paśla nastupleńnia śmierci. Heta značyć, dno ranki, raźmieščanaje nižej za ŭzrovień skury, kaža ab daŭnaści jaje pryčynieńnia mienš adnych sutak da momantu nastupleńnia śmierci. Pra jaje pryžyćciovaść možna vykazacca tolki pa najaŭnaści krovaźlićciaŭ. Makraskapičnych prykmiet krovaźlićciaŭ ŭ jaje vobłaści niama. Ci brali ekśpierty ranku dla histałahičnych daśledavańniaŭ na vyznačeńnie pryžyćciovaści i daŭniny pryčynieńnia, — nieviadoma. Chutčej za ŭsio, što nie: nad vucham ŭžo bačnyja ślady šva paśla anatamiravańnia. Takim čynam, fota zroblena ŭžo paśla praviadzieńnia siekcyjnaha daśledavańnia.
Na śpinie vyrazna bačnyja trupnyja plamy. Vidavočnych siniakoŭ nie baču. Što za karyčniavatyja afarboŭvańni ŭ pajaśnična-kryžavoj vobłaści, — nie mahu vyznačyć. Abo pierhamientnyja padsychańni (paśmiarotna), abo zapeckana kałavymi masami, albo niešta inšaje, što nie prychodzić u hałavu.
U cełym, na fota nie vidać ničoha, da čaho možna abjektyŭna pryčapicca», — kaža adzin z ekśpiertaŭ.
«Adzinaje, pa rancy ŭ vobłaści nadbroŭnaj duhi, kab nie rabić kaśmietyčnych defiektaŭ, tearetyčna dla histałohii mahli ŭziać z unutranaj pavierchni, kali skurna-ciahlicavy šmatok hałavy adpłastavali da taho ŭzroŭniu.
Heta značyć, tolki pa zdahadkach.
Mianie niekalki biantežyć mocnaja vyjaŭlenaść trupnych plam u vobłaści šyi. Heta moža być adnoj z mnostva ŭskosnych prykmiet miechaničnaj aśfiksii, ale tolki adnoj, i ŭskosnaj. Tvar śvietły, pakolki, chutčej za ŭsio, sasudy pralili vadkaściu dla balzamavańnia. Jaki koler byŭ u tvara da anatamavańnia, ciažka vykazać zdahadku. Zanadta mała infarmacyi na hetych fotazdymkach dla farmulavańnia niejkich vysnoŭ.
Što tyčycca čerapna-mazhavoj traŭmy, to tut naohuł składana pra niešta kazać. Subduralnyja hiematomy časta byvajuć naohuł bieź niejkich źniešnich prykmiet traŭmy. Tolki pa ŭnutranaj pavierchni skurna-ciahlicavaha šmatka hałavy čaściakom davodziłasia rabić vysnovy pa najaŭnaści i kolkaści traŭmatyčnych uździejańniaŭ.
Ahułam, na hety momant moža być šmat zdahadak, ale čahości vyraznaha niama», — robić vysnovu śpiecyjalist.
Voś kamientaryj druhoha śpiecyjalista:
«Pieršaje fota — ranka ŭ vobłaści levaha bryva.
Druhoje i treciaje: na śpinie trupnyja plamy, nie siniaki, pra heta kaža ich raźlitaja forma i adsutnaść na častkach cieła, što vystupajuć, moža tam jašče jość što na śpinie na fonie trupnych plam, ale pa hetym zdymku dakładna skazać nielha.
Čaćviortaje: siniaki na tylnaj pavierchni levaj kiści, u vobłaści levaha pramianiovazapiaścievaha sustava i na levym pieradpleččy.
Piataje: siniak (abo drapina?) na piaredniaj pavierchni vobłaści levaha kalennaha sustava.
Nakolki možna skazać pa kolery, jaki pieradajuć fota — paškodžańni śviežyja. Taksama na čaćviortym fota bačny zabity siekcyjny razrez, śled ad anatamiravańnia», — kaža sudmiedekśpiert.
Čytajcie taksama:
Źjaviłasia videa, jak Uschopaŭ sam zachodzić u RAUS. Praź dźvie hadziny jon budzie miortvy
