Jak paviedamiła BiełaPAN pastajanny pradstaŭnik MVF u Biełarusi Natalla Kaladzina, ekśpierty buduć zajmacca druhim ahladam pa prahramie stend‑baj, a taksama praviaduć kansultacyi pa raźvićci biełaruskaj ekanomiki za minuły hod i pierśpiektyvach na budučyniu.
Dla ŭdziełu ŭ hetych kansultacyjach Biełaruś 24—26 žniŭnia naviedaje dyrektar jeŭrapiejskaha departamienta MVF Marek Belka.
U ramkach raboty misii zapłanavany sustrečy va ŭradzie Biełarusi, Nacyjanalnym banku, Ministerstvie ekanomiki, Ministerstvie finansaŭ, Administracyi prezidenta. Pavodle słoŭ Kaladzinaj, praduhledžany taksama sustrečy Bielki z vyšejšymi dziaržaŭnymi čynoŭnikami Biełarusi.
Biełaruś źviarnułasia pa atrymańnie kredytu ŭ MVF u kastryčniku 2008 hoda «ŭ metach pavieličeńnia dziaržaŭnych zołatavalutnych reziervaŭ i stvareńnia «paduški biaśpieki», nieabchodnaj dla stabilnaj pracy ekanomiki va ŭmovach suśvietnaha finansavaha kryzisu».
U studzieni 2009 hoda kiraŭnictva MVF uchvaliła prahramu stend‑baj dla Biełarusi ŭ abjomie kala 2,46 młrd. dalaraŭ pad prahramu ekanamičnych reform, raźličanuju na 15 miesiacaŭ (da krasavika 2010 hoda). Pieršy tranš kredytu ŭ 788 młn. dalaraŭ ZŠA pa staŭcy LIBOR plus 0,75% hadavych pastupiŭ u Biełaruś 14 studzienia, astatnija srodki pieraličvajucca z ulikam štokvartalnych spravazdač biełaruskaha ŭrada.
29 červienia Saviet dyrektaraŭ MVF zaviaršyŭ pieršy ahlad u ramkach damoŭlenaści z uładami Biełarusi ab kredycie stend‑baj. Pry hetym fond zaćvierdziŭ vydzialeńnie čarhovaha tranša kredytu ŭ pamiery 679,2 młn. dalaraŭ ZŠA i pavialičyŭ u cełym abjom finansavaj padtrymki na 1 młrd. dalaraŭ — da 3,52 młrd.
Druhi tranš kredytu MVF pastupiŭ u Biełaruś 2 lipienia.