«Z momantu pačatku vajny pamiž Rasijaj i Ukrainaj mnohija mianie pytalisia — čamu ja nie vykazvajusia? Čamu ja maŭču?» — napisaŭ Face (Ivan Dromin) u siabie ŭ Instahramie.
«Ja chaču raskazać vam ab tym, što adbyvałasia sa mnoj u apošnija dva tydni.
Moj adkaz prosty — ja byŭ u šoku, ja prosta zdranćvieŭ, dy ja da hetaha času nie mahu pavieryć u toje, što heta zdaryłasia i praciahvajecca prosta ciapier.
U toje, što ŭ heta ŭciahnutaja maja kraina, u toje, što ludzi ź jakimi ja siabravaŭ, heta «razumiejuć», a niekatoryja navat uchvalajuć. Ludzi, ź jakimi ja žyŭ pa susiedstvie, z kim ja chadziŭ u adnu kramu.
(…)
Chto vinavaty, što heta zdaryłasia?
Ja chaču, kab vy viedali majo mierkavańnie.
«Pa-pieršaje, vinavata rasijskaja dziaržava. Ja viedaju, što heta za ludzi. Amal siem hadoŭ ja zmahaŭsia z uładaj za vyžyvańnie majho muzyčnaha prajekta va ŭłasnaj krainie. Ja prajhraŭ, prajhraŭ bitvu, ale nie vajnu. Hetyja ludzi tak i nie zmahli skazać mnie ŭ vočy, što ja ich vorah. Jany nazyvajuć siabie nośbitami ruskaha duchu, ale jany bajaźliŭcy, nabityja zamiežnymi banknotami. Jany zajmajucca vałtuźnioj za tvajoj śpinoj, ustaŭlajučy tabie pałki ŭ koły, pahražajuć arhanizataram i placoŭkam, a potym kažuć u ŚMI, što chłus heta ty. Ja muzyka, ja prosta sprabavaŭ rabić muzyku i jaje vykonvać, ale navat heta ŭ sučasnaj Rasii praktyčna niemahčyma, nie azirajučysia štodnia pa bakach.
Vinavacić varta vialikuju častku našaha naroda. Tych ludziej, jakija nie dumajuć ułasnaj hałavoj. Tych ludziej, chto ciapier radujecca litary «Z».
Bačyŭ by vas usich moj pradzied, jaki prajšoŭ usiu vajnu da Bierlina i byŭ uznaharodžany Ordenam Suvorava. Kali b jon viedaŭ, što praz 75 hadoŭ vy z honaram prydumajecie sabie ŭłasnuju svastyku i budziecie ličyć siabie vyzvalicielami Jeŭropy, vierałomna napaŭšy ranicaj na braterskuju krainu, jakaja ŭ 28,5 raza mienšaja našaj pa terytoryi, to jon by chutčej zastreliŭsia, čym praciahnuŭ za vas vajavać.
Kaho varta vinavacić jašče?
Mianie, usiu intelihiencyju, ŭsie hałasy pakaleńnia, usich muzykaŭ. Za toje, što kožny z nas byŭ niedastatkova śmiełym. Za toje, što my mahli zrabić bolš, ale pabajalisia abo palenavalisia. Za toje, što ŭśviadomili realnaść zanadta pozna.
Naprykancy ja chaču paznačyć try rečy.
Pieršaja reč: ja zaklikaju našu dziaržavu i armiju zadumacca i spynić razbureńnie haradoŭ i žyćciaŭ na terytoryi bratniaha naroda.
Druhaja reč: ja prašu prabačeńnia va ŭsiaho ŭkrainskaha naroda, za tyja pakuty, jakija pryčyniła vam naša kraina. Ja prašu prabačeńnia, za našu dziaržavu, za samoha siabie, za našych ludziej, tamu što chtości pavinien heta zrabić, i tak užo vyjšła, što hetaja nialohkaja dola zaŭsiody prypadaje na takich jak ja, tamu što ŭ sapraŭdnaha zła nikoli nie chopić śmiełaści pryznacca navat samim sabie va ŭłasnych złačynstvach.
I treciaja reč, jakaja tyčycca kankretna mianie i majoj karjery
Mianie, jak rasijskaha artysta, ciapier praktyčna nie isnuje, jak hramadzianina taksama. Ja bolš nie źbirajusia płacić padatki ŭ Rasii, ja źjechaŭ, i bolš nie pryjedu ŭ Rasiju, ja bolš nie budu davać kancerty ŭ Rasii.
Čamu? Bo mianie i maich blizkich vyžyli, vyžyli z ułasnaha doma, z ułasnaj ziamli, vyžyła vaša dziaržava, jakuju ja kančatkova admaŭlajusia pryznavać majoj z hetaj siekundy, i vyžyŭ naš narod, jakomu absalutna *** na ŭsio, pakul chapaje hrošaj na buterbrod z masłam.
Kali-niebudź, Rasija stanie hodnaj dziaržavaj, ź ludźmi, u jakich sučasny i razumny mientalitet, ale siońnia heta, na žal, nie tak. Ja spadziajusia kali-niebudź znoŭ ubačyć svaju siamju, ubačyć svaju aŭdytoryju, praśpiavać na ruskaj movie dla svajho naroda. I ja vieru, što heta adbudziecca. Bo padabajecca vam usim heta ci nie, ale budučynia Rasii za takimi, jak ja, a nie za takimi, jak vy. Budučynia Rasii heta ludzi, u jakich u rukach pendźli i mikrafony, a nie aŭtamaty z hranatami. Budučynia Rasii — heta dumka i svaboda. Budučynia Rasii — heta my. Nie vajnie. Svabodu Ukrainie. Svabodu Palitviaźniam», — napisaŭ Face.
