«Doktar Chaus» — bronzavy pryzior Vyšejšaj lihi KVZ-2021. Fota: vk.com/doktorhayss
U Vyšejšaj lizie hetaja biełaruskaja kamanda vystupaje z 2020 hoda — i robić heta vielmi paśpiachova. Minuły siezon prynios humarystam vychad u finał i bronzavyja miedali pa jaho vynikach. Pry hetym kamanda žartavała na aktualnyja temy, a palityka (u tym liku ŭnutranaja) časta stanaviłasia abjektam vostraj satyry.
Naprykład, dziejańni Alaksandra Łukašenki na mižnarodnaj arenie kavezešniki vykarystoŭvali jak padmurak dla numaroŭ, a niekatoryja ich minijaciury ajčynnaje TB uvohule vyrazała z pakazaŭ na terytoryi Biełarusi.
Adnak kolki dzion tamu pa sacsietkach paniośsia niehatyŭny rozhałas u dačynieńni da kamandy. Pa śćvierdžańni niekatorych prychilnikaŭ KVZ, padčas startu novaha siezona, 1/8 finała, biełarusy pakazali brudny žart. Sens jaho pierakazali tak: vystup adbyvajecca ŭ teatry rasijskaj armii, u toj čas, jak sama armija rychtujecca da vystupaŭ na płoščach Charkava dy Adesy, a finalny kancert praviadzie ŭ Kijevie. Pisali, što nibyta navat rasijskaje telebačańnie vyrazała numar z efiru.
Skrynšot pasta ŭ Fejsbuku
Zapisu skandalnaj hulni na medyja-resursach nie znajšłosia. U anłajn-ahladach 1/8-j zhadak niejkaj kramoły taksama nie nazirałasia, chacia ludzi, jakija ŭ režymie realnaha času sočać u zale za hulniami, takija rezanansnyja žarty zvyčajna pierakazvajuć.
Voś što nam udałosia daviedacca pra situacyju.
Varta pryvieści skandalny dyjałoh całkam. «Chausy» padali tekst tak:
— My vystupajem u teatry rasijskaj armii.
— A dzie sami akciory hetaha teatra?
— Jany na hastrolach. 20 lutaha Charkaŭ, 22 lutaha Adesa, 23 lutaha — vialiki kancert…
— Stop! Adkul ty ŭziaŭ hetuju infarmacyju?
— Dy z Bloomberg…
Jak tłumačać vidavočcy hulni, na momant televizijnych zdymak, a heta 17 lutaha, žart tyčyŭsia dezinfarmacyi z boku zachodnich ŚMI, bo pryblizna ŭ tyja daty tema aktyŭna abmiarkoŭvałasia raznastajnymi vydańniami.
«Nichto i pavieryć nie moh, što toj ža Bloomberg budzie mieć racyju.
Tamu kali žart padavaŭsia na «prahonach», na redaktury, z zale ŭsie ŭsprymali jaho pazityŭna: i kamandy ź inšych haradoŭ dy krain, i daśviedčanyja ŭ KVZ ekśpierty. Tym bolš, što repryza sa sceny prahučała inakš, čym jaje padali i paśla ŭzialisia tyražyravać ŭ sacsietkach.
Ale vielmi chutka situacyja źmianiłasia, z-za čaho tekst staŭ hučać žudasna dy abraźliva», — kažuć tyja, chto naviedvaŭ hulniu.
Nakolki viadoma, u efir žart nie pajšoŭ. Jak minimum tamu, što efiru hetaha nie było ni na «Pieršym kanale», ni dzieści jašče. Pieradača nie pabačyła śviet uvohule, adpaviedna i na Jutubie nie źjaviłasia — tudy vypusk zalivajecca tolki paśla televizijnaj tranślacyi.
Sam kalektyŭ razumieje niedarečnaść situacyi i škaduje, što niedarečny žart spravakavaŭ chvalu niehatyvu jak u bok «Doktara Chausa», tak i niepasredna KVZ.
«My nie mieli anijakaha namieru pakryŭdzić ukraincaŭ albo spryčynicca da palityčnych chalivaraŭ. Tamu možam tolki jašče raz paprasić prabačeńnia za niedaskanały žart», — adkazali pradstaŭniki kamandy.
Biazzuba i za ŭsio treba płacić: były hulec pra zakuliśsie rasijskaha KVZ
Alaksandra Maślakova ŭ KVZ na čas chvaroby zamienić Dźmitryj Nahijeŭ
