Naftavaja śvidravina ŭ Hiermanii. Fota: AR
Kali Bajden tłumačyŭ svajo rašeńnie, jon nazvaŭ vysokija ceny na naftu prablemaj vajennaha času, jakoj patrebny paŭnavartasny adkaz. Pačynajučy z maja, Vašynhton budzie vyvyodzić na rynak pa miljonie baralaŭ nafty za dzień. Heta budzie samaje vialikaje za ŭsiu historyju pastupleńnie nafty sa stratehičnych zapasaŭ ZŠA, jakija na siońnia składajuć prykładna 568 miljonaŭ baralaŭ, piša Wall Street Journal.
Bajden taksama źbirajecca źviarnucca da Zakona ab vajennaj vytvorčaści, jaki dazvalaje pašyryć vytvorčaść asobnaj pradukcyi ŭ metach nacyjanalnaj biaśpieki. Amierykanski prezident płanuje skarystacca im, kab pavialičyć vytvorčaść syraviny, jakaja vykarystoŭvajecca ŭ akumulatarach dla elektramabilaŭ i inšaj ekałahična čystaj techniki. Taksama Bajden zaklikaŭ Kanhres pryniać novy zakon, jaki b dazvoliŭ enierhietyčnym kampanijam paskoryć bureńnie novych śvidravin na ziemlach, jakija znachodziacca ŭ fiederalnaj ułasnaści.
Kali płany Bajdena pa raśpiačatcy naftavych reziervaŭ realizujucca, u reziervach ZŠA zastaniecca mienš čym 400 miljonaŭ baralaŭ nafty — minimalny z 1984 hoda abjom. U vypadku, kali situacyja budzie paharšacca dalej, taki krok pakinie ZŠA mała varyjantaŭ dalejšych dziejańniaŭ.
Čamu analityki nie pradkazvajuć padzieńnia cen na naftu navat paśla raśpiačatvańnia reziervaŭ
Krok ZŠA strymaje ceny ad dalejšaha rostu, ale naŭrad ci pryviadzie da ich źnižeńnia. Sprava u tym, što sankcyi suprać Rasii pryviaduć da padzieńnia pastupleńnia nafty z Rasii. U toj ža čas Saudaŭskaja Aravija i Abjadnanyja Arabskija Emiraty admaŭlajucca pavialičvać abjomy vytvorčaści (choć tearetyčna mahli b). U takoj situacyi praz paru miesiacaŭ ceny mahli b padskočyć i da 150 — 200 dalaraŭ za baral. Kali ž padzieńnie abjomu pastupleńnia nafty z Rasii kampiensujecca pastaŭkami z reziervaŭ ZŠA, takoha skačka cen nie adbudziecca. Vašynhton pierakonvaje Piekin i Deli dałučycca. Kali Kitaj, Indyja i Japonija zrobiać adpaviednyja kroki, efiekt budzie jašče bolš jaŭny.
Mnohija zachodnija kampanii ciapier paźbiahajuć kupli rasijskaj nafty, i ŭdzielniki naftavaha rynku tolki pačynajuć adčuvać sapraŭdny ŭpłyŭ taho, što pastaŭki z Rasii źnizilisia. Amierykanski analityk Bob Makneli tłumačyć, što situacyja z pastaŭkami nafty z Rasii vielmi składanaja, kab pastaŭki sa stratehičnych reziervaŭ mahli jaje radykalna vyrašyć. Ceny na naftu buduć raści ŭvieś čas, pakul budzie zachoŭvacca rasijskaja pahroza.
Analityki charaktaryzujuć krok Bajdena jak biesprecedentny, jaki dazvolić zbałansavać ceny na naftu jašče da ŭźniknieńnia na rynku jaje sapraŭdnaha deficytu.
ZŠA na rasprodažu zapasaŭ pa vysokaj canie vyjhrajuć, u toj ža čas Rasija atrymaje ad prodažu svajoj syraviny mienš, čym mahła. U hetym zaduma administracyi Bajdena. Adnak u doŭhaterminovym płanie ceny na naftu — a značyć, i zdolnaść Maskvy finansavać svoj płan zavajovy Uschodniaj Jeŭropy — buduć zaležać ad pavodzin Saudaŭskaj Aravii, AAE, Irana i Vieniesueły, čatyroch krain, jakija majuć mahčymaść naraścić zdabyču nafty. Heta kali brać pieryjad najbližejšych hadoŭ. Dalej ža svajo słova moža skazać adnaŭlalnaja enierhietyka. Enierhija sonca i vietra vykarystoŭvajecca va ŭsio bolšych maštabach, novym słovam maje stać pierachod Jeŭropy na vadarodnaje paliva.
Jeŭropa pierachodzić na «zialonuju» enierhietyku. I dla Rasii heta paraza
«Naša Niva» adnaŭlaje zbor danataŭ — padtrymać prosta
