Pamiž Piaskovym i žurnalistam vydańnia adbyŭsia nastupny dyjałoh:
Žurnalist: Vy stracili tysiačy sałdat, 6 hienierałaŭ, sotni tankaŭ. Heta prynižeńnie?
Piaskoŭ: Nie, heta niapravilnaje razumieńnie taho, što adbyvajecca.
Žurnalist: Što niapravilnaha ŭ tym, što ja skazaŭ?
Piaskoŭ: Amal usio, amal usio.
Žurnalist: Okiej, ale vy stracili tysiačy čałaviek?
Piaskoŭ: Tak, u nas značnyja straty, heta vielizarnaja trahiedyja dla nas. Ale nakont dvuch rehijonaŭ, to adstupleńnie ad Kijeva i Čarnihava — heta žest dobraj voli padčas pieramovaŭ. Heta byŭ akt dobraj voli, kab źniać napružańnie z hetych rehijonaŭ i pakazać, što Rasija hatovaja stvaryć kamfortnyja ŭmovy dla praciahu pieramovaŭ.
Nahadajem, što zhodna z apošnimi źviestkami Minabarony Rasii, va Ukrainie zahinuŭ 1 351 rasiejski vajskoviec i 3 825 atrymali ranieńni.
Taksama Piaskoŭ skazaŭ, što, maŭlaŭ, adnoj z metaŭ «śpiecapieracyi» było praduchileńnie Treciaj suśvietnaj vajny. Pavodle jaho słoŭ, Ukraina paśla ŭstupleńnia ŭ NATA mahła b napaści na Rasiju, i tady aljansu, jaki vałodaje jadziernaj zbrojaj, pryjšłosia b abaraniać Ukrainu.
Kreml spadziajecca na chutkaje zaviaršeńnie vajny va Ukrainie. Maŭlaŭ, rasiejskija vajskoŭcy «robiać usio, što ŭ ich siłach, kab davieści da kanca śpiecapieracyju. My spadziajemsia, što ŭ bližejšyja dni, u ahladnaj budučyni, hetaja apieracyja dasiahnie svaich metaŭ abo skončycca pieramovami».
Taksama Piaskoŭ zajaviŭ, što nie ličyć ustupleńnie Šviecyi i Finlandyi ŭ NATA ekzistencyjalnaj pahrozaj dla Rasii. Choć Finlandyja z Rasijaj niepasredna miažuje.
