Paddony z bojeprypasami dla Ukrainy ŭ transpartnym samalocie. Fota VPS ZŠA.
Krainy Zachadu adzinym frontam pačynajuć pastaŭki va Ukrainu braniatechniki i artyleryi.
Rej viadzie Brytanija. Siońnia paśla sazvonu kiraŭnikoŭ ZŠA, Vialikabrytanii, Francyi, Niamieččyny, Italii, Polščy, Kanady, Rumynii, NATA i ES brytancy zajavili pra hatoŭnaść pastaŭki broniemašyn z efiektyŭnymi zienitnymi kompleksami małoj dalnaści Stormer HVM z rakietami Starstreak.
Pientahon zajaviŭ, što Ukraina ŭžo atrymała ź inšych krain samaloty-źniščalniki, a taksama zapčastki, jakija dazvolać padniać u pavietra bolš vajskovych samalotaŭ. Takuju zajavu zrabiŭ pres-sakratar Pientahona Džon Kirbi siońnia.
Kirbi ŭdakładniŭ, što havorka idzie pra dapamohu, atrymanuju nie ad Złučanych Štataŭ.
Polšča ŭžo adpraviła Ukrainie sotniu tankaŭ, ZŠA — udarnyja bieśpiłotniki, niekalki haŭbic, savieckija viertaloty i broniemašyny staroha ŭzoru.
U toj ža čas Kanada taksama abviaściła pra namier pastavić artyleryju. Artyleryju ŭžo pieradali Ukrainie Słavaččyna i Čechija.
Pra namier pastavić Ukrainie ciažkuju zbroju napisaŭ premjer-ministr Niderłandaŭ Mark Rute pa vynikach razmovy z Uładzimiram Zialenskim.
Parłamient Italii z redkim dla palityčnaha śpiektra hetaj krainy adzinaduššam ŭchvaliŭ pastaŭki ciažkaha ŭzbrajeńnia — pakul nie kankretyzujecca jakoha.
A Rumynija śpiecyjalna pad pieradaču zbroi sa svaich zapasaŭ mianiaje nacyjanalnaje zakanadaŭstva.
Raniej ładnyja partyi ŭzbrajeńnia pieradali Ukrainie taksama Finlandyja, Šviecyja, Bielhija, Ispanija i Narviehija.
U pryhraničnym polskim Žešuvie štodzień pryziamlajucca 8 — 10 vialikich transpartnych samalotaŭ z uzbrajeńniami i bojeprypasami dla Ukrainy. Rasija vyjaviłasia niazdolnaja pierarezać šlachi pastaŭki zbroi Ukrainie. Nasupierak zajavam Maskvy, supraćpavietranaja abarona Ukrainy praciahvaje isnavać, i rasijskija samaloty nie rašajucca zalatać daloka za liniju frontu.
Niavyrašanym zastajecca tolki pytańnie abarony ad kryłatych i balistyčnych rakiet, jakimi Rasija mietadyčna źniščaje ŭkrainskuju infrastrukturu. Najaŭnych va Ukrainy sistem S-300 niedastatkova, a pastaŭki amierykanskich «Petryjotaŭ» ci to pakul łahistyčna niemahčymyja, ci to nie znajšli palityčnaha «apruvu».
Pastaŭki Ukrainie ciažkich uzbrajeńniaŭ pavyšajuć šancy na toje, što jana vystaić pierad rasijskaj ahresijaj.
