Tolki na palivie možna sekanomić kala 100 jeŭra
Niahledziačy na rekamiendacyi ŭradaŭ Łatvii i Litvy nie jeździć u Biełaruś, ludzi aktyŭna karystajucca mahčymaściu naviedać našu krainu bieź vizy. Zhodna z danymi Pamiežnaha kamiteta, za pałovu miesiaca takoj mahčymaściu skarystalisia amal 11 tysiač čałaviek. Pavialičeńnie pasažyrapatoku adznačajuć i litoŭskija pamiežniki.
U našu krainu litoŭcy niaredka jeduć vyklučna z ekanamičnych mierkavańniaŭ. Žycharam hetaj krainy vyhadniej za ŭsio nabyvać u Biełarusi paliva. Litr salarki ŭ Litvie kaštuje ŭ rajonie 1,8 jeŭra (kala 4,8 rubla), u toj čas jak u Biełarusi jaho cana składaje 2,28 rubla (kala 82 jeŭracentaŭ). Takim čynam, na kožnym litry paliva žychary Litvy ekanomiać amal 1 jeŭra. Nieskładana praličyć, što na aŭtamabilach ź vialikimi bakami tolki na zapraŭcy atrymlivajecca sekanomić kala 100 jeŭra.
Cyharety, ałkahol, leki
Biełaruski ałkahol taksama karystajecca popytam u našych susiedziaŭ. Minimalnaja cana butelki harełki abjomam 0,5 litra ŭ Biełarusi składaje 7,66 rubla (kala 2,8 jeŭra), u Litvie ceny na jaje startujuć z 7 jeŭra (kala 19 rubloŭ). Vieźci impartny ałkahol ź Biełarusi niavyhadna, tamu jaho zvyčajna kuplajuć na miažy ŭ kramach Duty Free.
Jašče adzin tavar, pa jaki tradycyjna jeduć našy susiedzi ź ES, — cyharety. Samyja dastupnyja ź filtram u nas kaštujuć pryblizna 1,5 rubla (kala 60 jeŭracentaŭ). Cyharety premijalnych marak daražejšyja, pa 4,5-5 rubloŭ za pačak. Ale navat jany kaštujuć tańniej, čym u Litvie — tam cyharety pradajuć pa 4-5 jeŭra za pačak (11-13,7 rubla).
Nastupnymi pa papularnaści ŭ litoŭskich šop-turystaŭ iduć leki, pryčym mienavita biełaruskaj vytvorčaści. Jany ich kuplajuć nie tolki dla asabistaha karystańnia, ale i dla pieraprodažu. Leki, pryviezienyja ź Biełarusi, možna kupić na vilenskim rynku «Harunaj». Tam ža da hetaha času možna sustreć u prodažy «Lidski kvas». Akramia kvasu, litoŭcy časta kuplajuć lidskija pałački, ziefir, chałvu, zhuščonku. Kali pahłybicca ŭ temu pakupak u Biełarusi, to možna znajści šerah inšych tavaraŭ, jakija ŭ nas kaštujuć tańniej, naprykład, žavalnyja humki ci Coca-Cola.
Krupy ŭ Biełarusi taksama tańniejšyja, čym u Jeŭropie. Kiłahram hrečki ŭ toj ža Litvie kaštuje ŭ rajonie 3 jeŭra (kala 8,3 rubla). U nas kiłahram pradajuć za 4-5 rubloŭ. Ale treba ŭličvać, što krupy i sol ad pačatku majuć nievysokija ceny, tamu jechać mienavita pa hetyja tavary zamiežnikam naŭrad ci budzie vyhadna. Čaho nielha kazać pra vyšej pieraličanyja hrupy tavaraŭ.
Zvarot PDV dla zamiežnikaŭ
Zamiežnikam, jakija robiać pakupki ŭ Biełarusi, taksama dastupnaja pasłuha pa viartańni PDV (Tax Free). Ab najaŭnaści takoj mahčymaści treba ŭdakładniać u handlovym punkcie. Śpis kram možna znajści tut.
Pry vyvazie tavaru za miažu pakupnik moža viarnuć 12,5—15 % ad cany tavaru. Hrošy viartajucca najaŭnymi ŭ biełaruskich rublach albo na kartku. Termin viartańnia na kartku składaje 2—3 miesiacy. Praź situacyju, jakaja skłałasia ŭ bankaŭskaj śfiery, padarožniku rajać daviedacca, ci prymaje bank-emitent pieravody ad Biełarusbanka. Z ulikam hetaha praściejšym vyhladaje varyjant z atrymańniem najaŭnych prosta na miažy.
Akramia hramadzian Litvy, prava ŭjazdžać bieź vizy ŭ Biełaruś atrymali žychary Łatvii.
Situacyja z cenami ŭ hetaj krainie padobnaja da litoŭskaj. Łatyšy taksama mohuć ekanomić kala adnaho litra na palivie, zapraŭlajučysia ŭ Biełarusi.
Situacyja z Polščaj krychu inšaja. Dla hramadzian hetaj krainy biaźvizavy ŭjezd (za vyklučeńniem turystyčnych metaŭ) nie praduhledžany, ale heta nie aznačaje, što palaki nie jeździać da nas na zakupy.
Paliva tam krychu tańniejšaje, čym u Litvie i Łatvii. Litr dyziela kaštuje kala 1,6 jeŭra (kala 4,45 rubla). Tamu, zapraŭlajučysia ŭ Biełarusi pa 2,28 rubla za litr, palaki ekanomiać kala pałovy cany.
Taksama haściej z Polščy cikaviać cyharety, harełka, kvas, chałva i ziefir. Jość roźnica i ŭ cenach na krupy. Kiłahram hrečki ŭ hetaj krainie kaštuje ŭ rajonie 6 rubloŭ, suprać 4-5 u Biełarusi. Ale roźnica ŭ cenach na krupy naŭrad ci zmoža akupić transpartnyja vydatki.
Tamu kali palaki, litoŭcy i łatyšy jeduć na zakupy ŭ Biełaruś, to najpierš ich cikaviać zusim nie tyja hrupy tavaraŭ, pra jakija kaža Łukašenka.
