Niahledziačy na toje, što YouTube błakuje prakramloŭski kantent, što parušaje praviły płatformy ŭ dačynieńni da bujnych padziej, źviazanych z hvałtam, jon usio jašče nie zabłakavany ŭ Rasii, u adroźnieńnie ad «Fejsbuka» abo Instagram. U lutym YouTube vydaliŭ kanał prakramloŭskaha prapahandysta Uładzimira Sałaŭjova.
Ale pa-raniejšamu isnujuć nie mienš za piać kanałaŭ, što praciahvajuć tranślavać prahramy Sałaŭjova. Guardian piša, što kanały, źviazanyja z rasijskimi ministerstvami abarony i zamiežnych spraŭ, u apošnija miesiacy taksama byli časova abmiežavanyja ŭ pracy, u pryvatnaści ŭ zapampoŭcy videa z apisańniem vajny jak «vyzvalenčaj misii». Dyrektar pa praduktach YouTube Nił Mochan u intervju vydańniu skazaŭ, što navinny kantent pra kanflikt nabraŭ tolki ŭ adnoj Ukrainie bolš za 40 młn prahladaŭ.
«Pieršy i, vidać, samy hałoŭny naš abaviazak — pierakanacca, što ludzi, jakija šukajuć infarmacyju pra hetyja padziei, mohuć atrymać na YouTube dakładnuju, jakasnuju i vierahodnuju infarmacyju», — skazaŭ jon. «Spažyvańnie kanałaŭ viadomych ńjusmejkieraŭ na našaj płatformie značna ŭzrasło — viadoma, va Ukrainie, ale taksama i ŭ krainach, jakija atačajuć Ukrainu, u Polščy, a taksama ŭ samoj Rasii», — dadaŭ pradstaŭnik kampanii.
YouTube nie daje śpis vydalenaha kantentu i kanałaŭ, ale Mochan skazaŭ, što bolšaja častka ź ich tranślavała kramloŭskija naratyvy pra ŭvarvańnie.
U Rasii ŭ YouTube prykładna 90 miljonaŭ karystalnikaŭ, choć rekłama na płatformie tam bolš nie dazvolenaja.
Na minułym tydni ministr ličbavaha raźvićcia Rasii Maksut Šadajeŭ zajaviŭ, što ŭłady nie buduć błakavać YouTube, niahledziačy na sprečki adnosna kantentu, u vyniku jakich płatforma była aštrafavanaja ŭ rasijskim sudzie za admovu vydalać zabaronienyja ŭładami RF videa. Šadajeŭ adznačyŭ, što błakavańnie samaj papularnaj u Rasii sacyjalnaj płatformy niehatyŭna adabjecca na karystalnikach. «My nie płanujem zakryvać YouTube», — skazaŭ ministr.
YouTube taksama ŭvioŭ suśvietnuju zabaronu na kanały, źviazanyja z rasijskimi dziaržaŭnymi ŚMI, uklučna z Russia Today i Sputnik.
