Fota: AR
«Toj fakt, što Hiermanija za 102 dni varvarskaj vajny na źniščeńnie cynična admaŭlajecca pastaŭlać navat staryja tanki Leopard-1 i BMP Marder, uvojdzie ŭ historyju. Heta hańba», — napisaŭ 5 červienia ŭ Tvitary ambasadar Ukrainy ŭ FRH Andrej Mielnik.
Hiermanija sapraŭdy dahetul nie adkazała Kijevu zhodaj na zapyt ab pastaŭkach Leopard-1 i Marder. Bolš za toje, Bierlin pakul navat nie pačaŭ pastaŭlać toje ciažkaje ŭzbrajeńnie, pra jakoje Hiermanija i Ukraina damovilisia viasnoj. A ŭličvajučy, što asnoŭnyja pastaŭki lohkaha ŭzbrajeńnia byli zroblenyja jašče ŭ sakaviku, a ŭ krasaviku i traŭni niamieckaja zbroja va Ukrainu praktyčna nie išła, možna zapadozryć, što Hiermanija pa niejkich pryčynach sabatuje hety praces.
Hiermanija — najbujniejšy ŭ śviecie donar Ukrainy
U niamieckich uładaŭ, kali mierkavać pa vystupie kanclera Ołafa Šolca, krytyka vyklikaje drenna prychavanaje razdražnieńnie.
Pa-pieršaje, Hiermanija ščyra nie razumieje, čamu ŭkrainskija ŭłady piedalujuć temu niamieckaj zbroi, u toj čas jak Bierlin — choć i nie kaža pra heta adkryta — zusim nie bačyć siabie ŭ jakaści važnaha vajennaha hulca. I tym bolš takoha, jaki moža damahčysia pierałomu ŭ vajnie, kaža niamiecki palitołah Dźmitryj Stracijeŭski:
«My pavinny razumieć, što Hiermanija — słabaja ŭ vajennym płanie kraina. Heta kraina, jakaja pieršyja dziesiacihodździ svajho isnavańnia [sa stvareńnia FRH u 1948 hodzie] paśladoŭna demilitaryzavałasia, a ŭ apošnija dziesiacihodździ bundeśvieru, miakka kažučy, nie nadavałasia dastatkova ŭvahi. U niamieckaj movie jość dobraja fraza-stiefmütterlich behandelt. Jak mačycha stavicca da padčarycy, tak i tut stavilisia da bundeśviera. To-bok ja mahu dapuścić, što [abiacanaj Ukrainie] zbroi prosta niama».
Mienavita varty žalu stan armii prymusiŭ ułady Hiermanii vyłučyć sto miljardaŭ jeŭra na terminovaje «zatykańnie dzirak» u abaronie i zadumacca ab stvareńni «samaj vialikaj armii ŭ Jeŭropie».
Pa-druhoje, Hiermanija (znoŭ nie kažučy pra heta adkryta) miarkuje, što inšyja krainy buduć uličvać jaje daŭniuju prablemu — chutkaść pryniaćcia rašeńniaŭ i nieabchodnaść doŭha ŭzhadniać luby krok.
Sprava ŭ tym, što ŭ Hiermanii pavolnaja i drenna pracuje biurakratyja, tłumačyć vajenny ekśpiert i były pałkoŭnik bundeśviera Ralf Tyle:
«Jana tak pracuje ŭnutry Hiermanii i hetak ža pracuje ŭ dačynieńni da Ukrainy. Heta nie naŭmysnaje zładziejstva, nie podłaść — heta taja situacyja, jakaja skłałasia i jakaja patrabuje palapšeńniaŭ.
Hiermanija vydatkoŭvaje kałasalnyja hrošy na humanitarnyja zadačy [va Ukrainie], jana na pieršych rolach u ekanamičnaj dapamozie. Dy i ŭ vajennym dačynieńni robić kudy bolš, čym jašče niadaŭna mahli sabie ŭjavić miascovyja palityki ŭ svaich samych śmiełych fantazijach».
Sapraŭdy, na sajcie niamieckaha MZS paznačana, što z 2014 hoda Hiermanija pieradała Ukrainie 1,83 miljarda jeŭra biazvypłatnaj dapamohi — bolš, čym ZŠA i lubaja inšaja kraina.
Hiermanija sprabuje pra heta adkryta kazać, ale ŭ jaje nie vielmi atrymlivajecca: pijar, asabliva dziaržaŭny, nikoli nie byŭ mocnym bokam hetaj krainy. Tamu kryŭdzicca na zatrymki z pastaŭkami zbroi «niaŭdziačna i nierazumna» z boku Ukrainy, ličyć Tyle.
Zychodziačy z sapraŭdy vialikich abjomaŭ ekanamičnaj dapamohi, Hiermanija sama maje prava skardzicca na padvojnyja standarty.
U rešcie rešt, nichto nie krytykuje Francyju za toje, što i jana nie zanadta ščyruje ŭ pastaŭkach ciažkich uzbrajeńniaŭ, abo ZŠA za pryncypovuju admovu ad pastavak zbroi, z dapamohaj jakoj možna nanosić ŭdary pa rasijskaj terytoryi.
Kali ž Hiermanija sprabuje dziejničać u zhodzie sa svaimi sajuźnikami (Der Spiegel piša, što pamiž Bierlinam, Łondanam, Paryžam i Vašynhtonam da hetaha času dziejničaje nieaficyjnaje pahadnieńnie ab admovie ad pastavak tankaŭ, kali nie ličyć tankaŭ savieckaj vytvorčaści, jakija pastaŭlaje va Ukrainu Polšča), to mienavita na jaje ŭsie šyški valacca. Da taho ž u Hiermanii jość i ŭłasnyja pryčyny vielmi adčuvalna stavicca da pastavak tankaŭ. Toj ža Der Spiegel, spasyłajučysia na krynicy ŭ bundestahu, piša, što niamieckija ŭłady surjozna aścierahajucca scenaryja, pry jakim ŭkrainskaja armija piarojdzie ŭ nastup i niamieckija tanki napaduć na rasijskuju terytoryju: Hiermanija nie moža sabie dazvolić hetaha, zychodziačy sa svajoj kancepcyi histaryčnaj pamiaci.
Nie spraščajuć praces adpraŭki zbroi i sajuźniki Hiermanii. U apošnija dziesiacihodździ niamieckaja vajennaja pramysłovaść była ciesna zaviazanaja na supracoŭnictva z susiednimi krainami.
Tak, snarady da ŭstanoŭki Gepard (jany ŭžo abiacanyja Ukrainie) vyrablajuć u Šviejcaryi, ale šviejcarcy, zachoŭvajučy svoj niejtralitet, zabaraniajuć ich adpraŭku ŭ rajon bajavych dziejańniaŭ. Pakul niezrazumieła, jak budzie vyrašanaja hetaja prablema, tak što ŭkrainski ministr sapraŭdy moža zapaścisia papkornam u čakańni «Hiepardaŭ».
Raskidanyja pa roznych krainach vytvorčyja łancužki, efiektyŭnyja dla demanstracyi jeŭrapiejskaha adzinstva abo, naprykład, vyrabu zbroi na ekspart u arabskija krainy, pakazali svaju niaŭstojlivaść pry pieršym ža surjoznym vyprabavańni.
Polšča, pastaviŭšy Ukrainie savieckija tanki, naprykład, patrabuje ad Hiermanii ŭ jakaści kampiensacyi «Leapardy» apošniaha pakaleńnia, jakich u samym bundeśviery ŭsiaho niekalki dziasiatkaŭ.
Pytańnie scenaryja zakančeńnia vajny
Inšaje pytańnie, jakoje chvaluje niamieckija elity, — scenaryj zaviaršeńnia kanfliktu. Hiermanija, jak i lubaja inšaja kraina, sprabuje nie prosta biazdumna davać, što prosiać, a praličvać situacyju chacia b na dva kroki napierad, asabliva ŭličvajučy svaje ścipłyja vajennyja resursy.
Tak, na pačatku sakavika Hiermanija, adpraviŭšy va Ukrainu lohkaje ŭzbrajeńnie i patrony, paličyła svaju misiju vykananaj i navat nie stała raskansiervoŭvać ciažkaje ŭzbrajeńnie, pakolki niamieckaja raźviedka ličyła, što Ukraina zdasca ŭsiaho za niekalki dzion i pastaŭlać jaho ŭžo nie budzie kamu.
Ciapier niamieckaja raźviedka kaža pra toje, što ŭkrainski supraciŭ u Danbasie, mahčyma, budzie złamany za čatyry-piać tydniaŭ, i da žniŭnia ŭsia Danieckaja vobłaść akažacca zaniataja rasijskim vojskam.
Heta značyć, Hiermanija nie vieryć u toje, što ŭkrainskaja armija moža vajennym šlacham adkinuć rasijskija vojski da davajennych miežaŭ — što možna było b nazvać vajennaj pieramohaj Ukrainy. Nie vieryć jana, zrešty, i ŭ vajennuju pieramohu Rasii. Hetaja vajna nie budzie mieć pieramožcaŭ, usio roŭna pryjdziecca damaŭlacca, ličać u Bierlinie.
Mienavita tamu Šolc nastolki ŭnikliva kaža pra mety vajny. Niamieckija žurnalisty zaŭvažyli, što kancler, jak i inšyja niamieckija lidary, paźbiahaje vyrazu «pieramoha Ukrainy». «Nas abjadnoŭvaje adna meta — Rasija nie pavinna vyjhrać hetuju vajnu. Ukraina pavinna vystajać», — zajaviŭ jon niadaŭna, i hetuju frazu toj ža lidar apazicyi Mierc časta cytuje jak prykład dvudušnaści ciapierašnich uładaŭ.
Adnak pazicyja Hiermanii, kali jaje ŭvažliva słuchać, davoli adnaznačnaja: Bierlin sapraŭdy hatovy dapamahčy Ukrainie «vystajać» i jak maha chutčej zaviaršyć vajnu dypłamatyčnym šlacham, ale nie hatovy dapamahčy joj «pieramahčy» — choć by tamu, što ŭ takuju pieramohu nie vieryć.
U Kijeva i Bierlina vialikija prablemy z kamunikacyjaj
Kamunikacyja pamiž uładami Hiermanii i Ukrainy ŭ apošnija miesiacy pakidaje žadać lepšaha. Najnižejšaj kropkaj, jakuju možna nazvać najbujniejšaj dypłamatyčnaj źniavahaj Hiermanii za dziesiacihodździ, stała admova pryniać u Kijevie prezidenta FRH Franka-Valtera Štajnmajera z-za jaho byłych suviaziaŭ z Rasijaj. Štajnmajer u siaredzinie krasavika źbiraŭsia jechać va ŭkrainskuju stalicu z prezidentami Polščy i Bałtyjskich krain.
U toj momant, kali jon znachodziŭsia ŭ Varšavie i ledź nie siadaŭ u ciahnik, z Ukrainy pastupiŭ sihnał, što pryjezd niamieckaha palityka źjaŭlajecca niepažadanym. Polski prezident i bałtyjskija kalehi adpravilisia ŭ Kijeŭ bieź jaho. Vajenny ekśpiert Ralf Tyle kaža, što z boku Kijeva heta davoli niedalnabačnyja pavodziny:
«Abražać taho čałavieka, jaki pradstaŭlaje ŭsich niemcaŭ, davoli nierazumna. Heta i była hałoŭnaja katastrofa, usio astatniaje — prosta chvost hetaj kamiety. Da taho momantu, kali ŭ Štajnmajera adklikali zaprašeńnie, jon užo pakajaŭsia [u suviaziach z Rasijaj] — čaho ja b naohuł nie staŭ rabić na jaho miescy. Niahledziačy na heta, jamu ŭkazali na jaho miesca. Heta pryvodzić da taho, što niamieckija čynoŭniki pryjazna ŭśmichajucca, ale za začynienymi dźviaryma nie tak imknucca dapamahčy Ukrainie, jak rabili b heta biez abraz».
Z-za dypłamatyčnaha skandału sa Štajnmajeram ad pajezdki ŭ Kijeŭ admoviŭsia i Šolc. Ukrainski ambasadar Mielnik u adkaz nazvaŭ Šolca «pakryŭdžanaj liviernaj kaŭbasoj» — fraza, na žal dla Šolca, pryžyłasia. Naprykład, jaje vykarystoŭvaje ŭ svaim telehramie Dźmitryj Miadźviedzieŭ.
Faktar kpinaŭ Mielnika dla ŭkrainska-niamieckich adnosin składana acanić adnaznačna. Jasna tolki, što jon zajmaje ŭ niamieckaj palitycy unikalnaje miesca, jakoje nie zajmaje ni adzin ź inšych zamiežnych dypłamataŭ, kaža palitołah Jusupaŭ:
«Ja zadavaŭ pytańnie ludziam, jakija raźbirajucca ŭ nacyjanalnych miedyja krain, jakija padtrymlivajuć Ukrainu, naprykład Francyi, Vialikabrytanii i Kanady. Dyk voś, u hetych krainach naohuł nichto nie viedaje imia pasła Ukrainy. A ŭ Hiermanii proźvišča Mielnik u topavaj častcy śpisu paznavalnaści palityčnych fihur. Hetaha treba jašče damahčysia! Heta novaje prafiesijnaje kreda — pasły-influensiery».
Pra składanaść pracy z Andrejem Mielnikam raskazvaje i Ralf Tyle:
«Ja b skazaŭ Mielniku (ja sustrakaŭsia ź im, jon całkam pryjazny čałaviek, jaki časam pavodzić siabie nievynosna), što mienš publičnaści pryniesła b bolš efiektu. Siarod niamieckaha biznesu i pramysłovaści vielmi šmat ludziej, jakija ščyra chočuć dapamahčy Ukrainie, i maleńkaja hrupa prafiesijanałaŭ pry pasolstvie, jakaja mahła b naładzić kantakty i paskoryć pracesy, damahłasia b ad niamieckaj biurakratyi značna bolšaha. Adnak jon pavodzić siabie tak, što ludzi paźbiahajuć kazać toje, što dumajuć, u jaho prysutnaści».
Ukrainskija žaŭniery ŭžo vyvučajuć, jak karystacca «Hiepardami» — u Hiermanii
Pa-niamiecku pavolna, ale ŭ cełym efiektyŭna ruchajucca i inšyja pracesy. Ukrainskija sałdaty ŭžo ciapier asvojvajuć u Hiermanii «Hiepardy» i «Pancar-haŭbicy». A niekalki dzion tamu Ukrainie byli abiacanyja rakietnyja kompleksy Iris-T SLM — vielmi sučasnaja i efiektyŭnaja zbroja, jakaja była vyprabavanaja mienš za dziesiać hadoŭ tamu i pryznačanaja dla baraćby z rasijskaj avijacyjaj.
Pra toje, što ŭ Hiermanii sočać za bajavymi dziejańniami i sprabujuć dapamahčy čymści, što dakładna spatrebicca, śviedčać i zajaŭlenyja pastaŭki radyjołakacyjnych stancyj Cobra. Jany, jak ličyć Bundeśvier, lepš za ŭsich u śviecie vyznačajuć kaardynaty varožaj artyleryi — a ŭ ciapierašniaj vajnie mienavita artyleryja adyhryvaje vyrašalnuju rolu.
Adnak usie hetyja patrebnyja rečy ź biednych zapasaŭ Bundeśviera spačatku pavinny prajści praz žorny niamieckaj biurakratyi i składanaj ukraina-niamieckaj kamunikacyi.
Baki nie vielmi daviarajuć adzin adnamu: Ukraina padazraje, što Hiermanija nie straciła tajemnych simpatyj da Rasii, a Bierlin nie choča, kab Kijeŭ zanadta zachaplaŭsia vajnoj (Ukraina pavinna tolki «vystajać»), i niepakoicca, što niamieckija «Leapardy» zajeduć na rasijskuju ziamlu.
Uličvajučy, što Hiermanija pa-raniejšamu zaležnaja ad rasijskaha hazu, Bierlin ličyć, što robić maksimum z taho, što moža sabie dazvolić. U rešcie rešt, kali FRH budzie zaciahvać pastaŭki zbroi, to ŭ adkaz atrymaje chiba što jašče adzin rezki tvit Mielnika. A kali pierastarajecca, to Kreml moža razburyć niamieckuju ekanomiku, pierakryŭšy haz, ci ŭvohule abviaścić Hiermaniju bokam kanfliktu ź niepradkazalnymi nastupstvami (a kolki-niebudź nadziejnaj armii ŭ krainy prosta niama). Hiermanija ličyć, što idzie ŭ hetaj situacyi na achviary, ale ich nie ceniać.
