Samaloty Bałtyjskaj misii NATA ŭ niebie nad Litvoju. Fota: AR
Nakolki realnyja pahrozy?
«Ja dumaju, što pahrozy Rasii realnyja. Inšaje pytańnie, pahrozy čym? Tamu što pačynajucca razmovy, što Rasija rychtuje jak minimum vajennaje ŭvarvańnie ŭ Litvu. Ja, ščyra kažučy, nie dumaju, što ŭ najbližejšy čas Rasija moža pasprabavać ažyćciavić poŭnamaštabnaje ŭvarvańnie. Ale što Rasija sprabuje cisnuć na Litvu i budzie stvarać dla hetaha dadatkovyja instrumienty, ja praktyčna ŭpeŭnieny», — kaža palitołah.
Pavodle jaho, krajni varyjant składajecca ŭ tym, što ŭ suviazi ź niemahčymaściu dastaŭki tavaraŭ u Kalininhrad i ŭ suviazi z prablemami z tranzitam, u suviazi z tym, što pahadnieńnie ź ES nie vykonvajecca, rasijskija samaloty nie majuć prava ŭvachodzić u pavietranuju prastoru ES i h.d.,
Rasija abviaščaje, što jana prosta adpraŭlaje pramym šlacham samaloty praź Biełaruś nad Litvoj u Kalininhrad, zabiaśpiečvajučy heta siłami svaich hrupovak SPA Kalininhradskaj vobłaści i tych SPA, jakija zavieźli ŭ Biełaruś pierad napadam na Ukrainu.
Tady pačniecca maštabny kryzis, kali zrazumieła, što havorka, z adnaho boku, idzie pra pramuju ahresiju, a ź inšaha boku, heta nie vajskovaja ahresija ŭ poŭnym sensie hetaha słova,
bo nichto nikudy nie stralaje, vajskovyja samaloty ŭ pavietranuju prastoru Litvy nie zachodziać i nie vielmi zrazumieła, što rabić z hruzavymi samalotami, tym bolš z hramadzianskimi samalotami.
Što z hetym rabić — niezrazumieła. Sprabavać im pieraškodzić — heta ryzyka taho, što kanflikt sapraŭdy stanie vajennym, tamu što kali rasijskaja SPA sabje luby nataŭski samalot, vynik budzie zrazumieły.
«Pačniecca poŭnamaštabny kryzis, jaki budzie pahražać stabilnaści samoha NATA, kali krainy nie akažuć žorstkuju adnaznačnuju adnačasovuju padtrymku Litvie. Ja nie ŭpeŭnieny, što jany ŭsie na heta hatovyja», — havoryć Praabraženski.
Čamu Litva takaja advažnaja?
«Ja dumaju, što Litva i damahałasia hetaha — prademanstravać, što jana hatovaja, kali spatrebicca, na vielmi žorstkija abmiežavańni. I jana nie pabaicca nastupstvaŭ. Kab Maskva nie dumała, što jana maje spravu z čarhovaj miakkaj jeŭrapiejskaj dziaržavaj, jakaja budzie moŭčki hladzieć, jak rasijanie robiać što chočuć».
Miarkujučy pa paničnych krykach z Kramla, u Litvy heta atrymałasia.
«Litva takaja śmiełaja, tamu što tam razumiejuć, što heta adziny sposab razmaŭlać z bandytam. Pakolki my razumiejem, što heta hopnicki režym, kali da ciabie padychodziać u padvarotni z prapanovaj kupić cahlinu, to ty, naprykład, možaš uciačy. Litva nie moža ŭciačy ad Rasii, pierajechać na inšy kantynient. Značyć, treba bić u adkaz. I heta Litva dobra razumieje».
Praabraženski kaža, što adziny palityk, da jakoha Pucin adčuvaje pavahu, — heta Erdahan, jaki addaŭ kamandu źbić rasijski samalot. Pucin zapavažaŭ Erdahana, tamu što toj razmaŭlaje na adnoj ź im movie. «A inšuju movu rasijski lidar, na žal, užo pierastaŭ razumieć».
Litva, adpaviedna, taksama imkniecca razmaŭlać na toj ža movie, nakolki joj heta dazvalaje ŭdzieł u ES i NATA. «Tamu što heta nie tolki siła, ale časam i słabaść, abmiežavalniki, na jakija treba źviartać uvahu, prymajučy lubyja surjoznyja rašeńni», — havoryć palitołah.
Kolki Rasii treba stvaryć kryzisaŭ, kab Jeŭropa adkazała siłaj?
«U toj momant, kali vajna stanie tańniejšaj, čym toj mir, jaki arhanizuje Rasija, siadajučy ŭsim na hałovy, Jeŭropa budzie hatovaja vajavać.
Niekatory mir prynosić značna bolš achviar i źniščaje bolš čałaviečych žyćciaŭ (jak heta ciapier adbyvajecca va Ukrainie), čym vajna, u jakoj udzielničaje vialikimi siłami bolšaja kolkaść krain», — miarkuje Praabraženski.
Jon kaža, što kali b ciapier u vajennym kanflikcie ŭdzielničała NATA, to kolkaść zahinułych była b mienšaj, tamu što nie było b takoha sudakranańnia cyvilnych z vajskoŭcami, i bai išli b na inšych terytoryjach.
Pad «tańniejšaja» palitołah nie maje na ŭvazie hrošy. Najpierš, heta žyćci. «Hoład u Afrycy, hoład na Blizkim Uschodzie, hibiel tysiač ludziej va Ukrainie, biežancy ŭ Jeŭropie i h.d. — u patencyjale tyja prablemy, jakija stvaraje Rasija, jany stvarajuć ahulnasuśvietnuju niestabilnaść. Rasija — handlar strachami. I niekatoryja ź ich jana ŭmieje realizoŭvać, u tym liku i čužymi rukami», — havoryć palitołah.
Praabraženski miarkuje, što ES stamiŭsia ad hetaj niestabilnaści. Pavodle jaho, Jeŭropa apošnija piać hadoŭ — rehijon, jakija najbolš uzbrojvajecca ŭ śviecie. «Kali stabilnaść nie atrymajecca adnavić, Jeŭropa pieratvarycca ŭ samy vajujučy rehijon», — kaža jon.
Pakul u ES jość mahčymaść hasić kanflikty, jon robić heta — hrašyma, dypłamatyjaj. Kali jon zrazumieje, što hety kryzis nie ŭdajecca spynić ničym, akramia vajennaj siły, jon prymienić vajennuju siłu.
«I ŭvarvańnie Rasii ŭ Litvu, kali takoje zdarycca, ja dumaju, budzie situacyjaj, kali ES prymienić siłu», — miarkuje Praabraženski.
Čytajcie taksama:
Chadarkoŭski: U ciapierašniaj situacyi nijakaj vajny nie na adzin hod nie budzie. Budzie vielmi chutki projhryš Ukrainy
«Hałoŭny ideałahičny pasył pramovy Pucina — pieravieści vajnu ŭ «padzieju druhoha płana», zrabić jaje fonavaj»
Hirkin (Strałkoŭ): Bitva za Danbas zakančvajecca vyhadnaj Kijevu ničyjoj
